In him lo tih zui dan tur sawiho Ṭhiahsak thlenga hmalak an rel

Aizawl Municipal Council (AMC) Technical Committee on Safety of Building chu nimin khan an chairman C Lalsawivunga, AMC vice chairman hoin a pisaah an ṭhu khawm a; veng hrang hranga in him loa ngaihte tih zui dan tur an sawiho a, a ṭul chuan ṭhiahsak thlenga hmalak an rel.

Meeting-ah hian Mission Veng, Dawrpui, Dinthar leh Bungkawna in him lo ṭhenkhat te, Govt. Aizawl College building top floor ṭhiah chungchang te, Durtlanga Mizoram Hindi Training College building, Chanmari-a Accounts & Treasuries directorate building leh Chaltlanga MBSE Office building him lote chungchang an ngaihtuah a ni.
Meeting chuan, in him lote chungchangah dan anga khauh taka hmalak an rel a; a ṭul chuan ṭhiahtir leh ṭhiahsak thlenga hmalak ni se, an ti.
Vanglaini palai zawhna chhangin C Lalsawivunga chuan mithiamte'n in an endik hnua a him lo ngeia an hriatte chu ṭhiah sak thlenga hmalak theihna dan an neih thu a sawi.
C Lalsawivunga chuan in him lo nia hriat report engemawzat an dawng tih sawiin, "Kan report dawnte hi bawhzuiin a hmuna mithiamte nen kan endik vek tawh. Ṭhiah ngai tura ngaihte pawh a awm nual a ni," a ti a, hma an lak tak tak hmain final spot verification neih leh an tum thu a sawi.
AMC Vice Chairman C Lalsawivunga chuan, AMC Technical Committee on Safety of Building Committee thuchhuak ngai pawimawha in him lo ṭhiat tate chungah lawmthu a sawi a; mipuite chu Committee thu ngai pawimawh turin a sáwm nghal a ni.