ZORO president R Thangmawia a thi
Zo Reunification Organisation (ZORO) president R Thangmawia (80), Zemabawk chu nimin khan India huna chhun dar 12:45-ah Geneva, Switzerland -ah a thi. Aizawla a ruang rawn thlenpui hun tur hriat a la ni lo.
Thu dawn danin, R Thangmawia hi July 20-24, 2015 chhunga UNO hmunpui, Geneva-a UN 8th Session on Expert Machanism on The Rights of Indiginous People neiha tel turin ZORO aiawhin a kal a; nimin zing khan a thlenna hotel bual pindanah nikhaw hreloa hmuh a ni a, dawmdawiiin panpui a nih laiiin a thii. Amah hi zunthlum (diebetes) nei a nih avangin stroke vanga thi nia hriat a ni.
R Thangmawia hi Maite khuaah June 13, 1936-ah a piang a, zirna lamah B.Com a ni. MNF rammut laiin a tel ve a, senator a ni ṭhin. ZORO din a nih hnuah telin, Zofate rorelna pakhat hnuaia an awm theih dan tur zawngin hma a la ṭhin a; July 17, 1991-ah ZORO president a ni ṭan a, tun thlengin president a ni zui ta a ni.
Mizo Zirlai Pawl leh Mizo Students Union-te chuan a thuchhuah siamin, R Thangmawia a thi chu pawi an tih thu leh an ui thu an tarlang. MZP chuan R Thangmawia chu Zofest 2014-ah chawimawina an hlan thu sawiin, “Zofate insuihkhawm theih nana a hmalakna leh a hmachhawpte tihhlawhtlin a nih theih nan hma kan la dawn a ni,” an ti. MSU pawhin, Zo hnahthlak hnam hrang hrang inpumkhatna tura R Thangmawia hnathawh leh inpeknate chu an ngaihhlut thu an sawi.