KHAWTHLIR

CM relief fund
Chief Minister relief fund atan Mizoram Florists’ Association-in Rs. 10,000 leh Chanmari Branch YMA, Serchhipin Rs. 2,000 an chhung lut.

Lei khì enfiah
Tun hnaia ruahsûr vanga July 18, 2015-a Champhai Kanan Venga lei tawlh chu nimin khan DC H Lalengmawia’n a enfiah. Champhai Kananah hian hmun ṭhenkhatah chuan ft. 4 vel a tlakhniam belh leh bakah, metre 50 vela thui a khîk belh a ni.

Zirlai tumsak
MZP headquarters, Mamit chuan, Mizoram College Teacher’s Association (MCTA) Mamit College branch-te’n zirlai, sum leh pai harsatna vanga college admission ti thei lo mi parukte admission fee an tumsak niin an tarlang a; lawmawm an tih thu an puang.

Zirlai thar lawm
Aizawl North College chuan nimin khan Vanapa Hall-ah zirlai lut tharte lawm luhna leh zirlai chhuak tate thlahna hun an hmang. Aizawl North College hian B.A degree nei thar an zirlai 125 hnenah lawmpuina thuchei an hlan a; kuminah zirlai lut thar 528 an nei a ni.

Heroin man
YMA sub-headquarters, Serchhip hnuaia Anti-Drugs Squad-te chuan July 19, 2015 zan dar 11:30 khan heroin gram 7 an man a, a neitua puh Lalduhawmi (18) d/o J Lalduhthara, Champhai Dinthar Veng nia insawi leh Laldinsangi (24) d/o Lalrinawma, Serchhip Chanmari nia insawite an man bawk.

V/C bye-election
Nimin khan Saiha district-a Chhaolo, Siata-II, Maisa leh Ahmypi-ahte village council bye-election neih a ni a; tluang taka vote thlak a ni. Vote thlak hi zing dar 7 aṭanga tlai dar 4 thleng neih niin, vote thlak zawhah vote chhiar nghal a ni a, result erawh hriat hman a ni lo. Siata-II leh Maisa-ah hmeichhe tana seat pakhat ve ve hauh a ni a; khaw dangah chuan seat hauh a ni lo.