Vajirao lakah FIR ziah luhna tur hre lo

Aizawla coaching academy pakhat, Vajirao Coaching Academy, Vaivakawna chu dan angin thil an ti lo nia hriat vangin Mizo Students Union (MSU) general headquarters-in Vaivakawn Police Station-ah FIR an thehlut a, mah se, police-te'n thubuai (case) ziah luhna chhan tur an hre lo.

Vajirao IAS Academy lakah hian MSU chuan an president PC Lalrinhlua hmingin June 4, 2015-ah Vaivakawn Police Station-ah FIR an thehlut a; Vajirao Academy chu an in sawi ang ni lo leh phalna nei loa din nia an hriat vangin chhui chiang turin police an ngen a ni.

MSU FIR-ah chuan Vajirao IAS Academy chuan registration a nei lo a, Ministry of Corporate Affairs-ah trademark registration an dil mek nia an hriat thu te; Delhi-a hmunpui nei anga an inpuan laiin, Delhi-ah Vajirao IAS Academy a awm loa an hriat thu te; Vajirao IAS Academy proprietor Dilip Kumar thiamna (quaification) leh service experience chhui chian an duh thute an ziak.

Vanglaini palai zawhna chhangin Vaivakawn PS officer in-charge chuan, Vajirao IAS Academy hi MSU-te'n ni hnih vel an khârsak hnuah an hawntir leh tih a sawi a, "Zirlai kal laklawhte an awm a, Decem­ber 2015 thleng kal­pui phawt turin an inti a, chumi chhung chuan Firms & Society-ah registra­tion tifel turin an inti a ni," a ti. MSU-te hian July 7, 2015-a an press release-ah chuan, July 8, 2015 aṭangin tiam chin awm loa an khàrsak tur thu an lo tarlang tawh a ni.
Vaivakawn PS OC chuan, Vajirao Vaivakawn PS IAS Academy lakah MSU-in FIR thehlut mah se, case ziah luhna tur point an hmuh loh thu a sawi a, coaching academy-te'n Firms & Society-ah bâk registration tihna tur an hriat loh thu leh, hemi chungchangah hian sorkar department dangte pawh an zawh kual tawh thu a sawi.
Zawhna chhangin Police OC chuan, Vajirao IAS Academy chu police-in titawp tura an hriattir loh thu an sawi bawk.
Thu dawn danin, Vajirao IAS Academy hi tunah hian an la kal zel a, mahse advertisement ti tawh lo tur te, zirlai la thar tawh lo turte leh signboard tár tawh lo tura hriattir an ni. Heng hriattirnate hi police leh sor­kar lam thupek a nih loh thu sawiin, Vaivakawn PS OC chuan, MSU lam tih a nih thu a sawi.
Vanglaini palai zawhna chhangin Vajirao Aca­demy enkawltute chuan, Firms & Society-ah registration tih tuma hma an lak mek thu an sawi.
Hetih lai hian, Ai­zawl­a coaching academy dang, Career Point, Zar­kawta thawkte chuan Vanglaini palai zawhna chhangin, Career Point chu Mizorama Firms & Society-ah ziah luh a ni a, chumi bak chu sorkarah registration tihna dang an neih loh thu an sawi a; Firms & Society-ah bak registration tihna tur emaw, phalna lâkna tur emaw an hriat loh thu an sawi bawk.
Higher & Technical Education department hotute pawhin Mizorama coaching academy-te chu khawi aṭanga phalna la tur nge tih leh, khawia registration ti tur nge an hriat loh thu an sawi a, "Vajirao Academy chung­changa boruak a awm avangin kan ngaihven a, kan zir chiang ve tho a; keini lam aṭang chuan thil dik lo kan hmu lo a, phalna pe theitu pawh kan ni lo," an ti.