Kum 5 chhungin P&S-in nuai 42.99 a hloh

Printing & Stationary (P&S) department chuan sorkar department dang ṭhenkhatten P&S department dâwr loa dan kalha dawr dang aṭanga bungrua an lei ṭhin avangin kum 2009 aṭanga 2012 chhungin Rs. 42,99,000 a hloh.

Printing & Stationary department hian sorkar department hrang hrangte’n tlawm zawka office-a hman tur stationery item an lei theihna turin a hlawmin a la khawm a, chu’ng bungruate chu Aizawl, Lunglei leh Saihaa a dahkhawmna hmun aṭanga pek chhuah ṭhin a ni.

Sorkar thupek dinglai ang chuan, sorkar department-te’n P&S department aṭangin bung­rua an lei tur a ni a, P&S department-in a nei loh a ni erawh chuan phalna lain hmun danga mi P&S department rate angin an lei thei thung.

Comptroller and Auditor General of India (CAG) Report 2013-14 chuan, Finance department leh P&S department ten ṭum eng emaw zat sorkar thupek dinglai zâwm tura hriattirna an tichhuak chungin, Aizawl district-a sorkar department tam tak chuan phalna la hmasa loin dawr dang aṭangin bungrua tam tham tak an lei ṭhin niin a tarlang.

CAG Report tarlan danin, department-te’n sorkar thupek an zawm loh avang hian Luang­mual, Aizawla P&S kudama bungrua tam tak chu dah ṭàwl a ni a, bungraw tam tak a chhiat bakah, a ṭhen chu a thi hman a ni. Bungraw chhia tam tak a awm avangin kum 2009-2012 chhung P&S department chuan cheng nuai 42.99 a hloh a ni.