Biometric Enrolment-ah July 9 thlengin Mi 4,01,201 chhinchhiah an ni tawh

Mizorama Biometric Enrolment neih mekah July 9 thleng khan mi 4,01,201 chhinchhiah fel tawh an ni a, hei hi kum 2011 chhiarpuia Mizorama mihring awm zat aṭanga chhutin 46.40% a ni.

Biometric Enrolment-a chhinchhiahte hi Aizawl district-ah mi 1,59,898, Lunglei district-ah mi 48,619, Lawngtlai district-ah mi 24,724, Saiha district-ah mi 19,115, Ser­chhip district-ah 21,060, Champhai district-ah mi 47,613, Kolasib district-ah mi 44,163 leh Mamit district-ah mi 36,019 a ni.

Biometric Enrolment hi distrcit hrang hranga hmun ruatahte chhunzawm zel a ni a, inziak lut turin voter’s ID card (EPIC), ration card, driving license emaw, PAN card emaw hman theih a ni.

Biometric Enrolment-a ram khua leh tui chhinchhiahna atan hian mit naute thla, kutze thla leh hmel lan dan thlalak hman a ni a, heng thlalakte hi Delhi-a Unique Identification Authority of India hnenah thawn a ni a, tihfel turte an tihfel hnuah anni chuan chhinchhiah fel tawhte hnenah Aadhar Card an pe chhuak thin a, card hi dakah thawn thin a ni.

Aadhar Card hi thil chi hrang hrang, sorkar atanga dawn theih dawn nan te, bank account hawn nan te, ei rawngbawlna gas subsidy dawn nan te, ni za inhlawhna leh mi rethei in sakna, IAY atanga tanpuina dawn nante leh zirlaiten scholarship an dawn nante hman a ni.