Eptu ṭhalaite’n Congress Thlirfim an hâl Pastor-te nekchep tumah Congress an puh

Eptu party pali - MNF, MPC, ZNP leh BJP ṭhalaite chuan nimin khan Vanapa Hall kawtah sorkar policy do pastor-te hming ziahna tur an chhuah avangin Congress party chanchinbu ‘Congress Thlifim’ an hâl. Congress party chu pastor-te nekchep tumah an puh.

Congress Thlifim halna hun kaihruaitu MNF ṭhalai president K Vanlalvena chuan political party-te chu na tak tak an inbeih ṭhin thu sawiin, “Party inbeihna thil hi chu kan hal ngai lo. Tuna kan hal tur hi kohhran hruaitute beihna anih avangin kan la thu tak hle. Hetiang thil hi a thlen tawh lohna atan kan hal a ni,” a ti.

Eptu party ṭhalaite chuan thuchhuah siamin, July 2015-a Congress Thlifim tihchhuah a nih hmain KṬP branch hminga Synod Office-a pastor-te list dil chhuakah Congress party an puh a, “Kohhran rawngbawltute chungah hleilen an tum tih a chiang. KṬP hmingchhâla dâwt phuahchawp hmanga Synod Office an bum duhna hi a tenawm. Congress party hian Synod Office hi ngaihdam a dil ngei hi kan phût tlat a ni,” an ti a; Congress party thil tih chu pastor-te nêkchêp leh tihbawrhbân tumna a nih thu an sawi.

Congress Thlifima thuchhuah chu mimal ṭhahnemngaihnaa tih anga Congress party-in sawi chu thu awmze nei lo nia sawiin eptu party ṭhalaite chuan, “Mipui thinrim tawh hnua ‘engmah ka hriatpui ve lo’ titu pawimawhna nei vak lo, a hminga publisher atana ziah lan pahnihte’n bânna an thehlut hi, Congress party-in mipui rilru lâk pên nana thawnthu dang siam an tumna mai a ni,” an ti.

Eptu ṭhalaite tarlan danin, political party inrêlbawlnaah president, vice president leh treasurer-te chu sum pe chhuak theitu an ni a; Congress Thlifim copy 3,000 chu chanchinbu semtute hlawh neiin an semtir a, chu chuan an party elected office beader-te hnen aṭangin sum an la chhuak tih a tichiangah an ngai a ni.

India mipuite chuan Fundamental Right hnuaiah sakhaw tinin an sakhaw thurin leh zirtirna an puang chhuak thei tih sawiin Eptu ṭhalaite chuan, "Mizote Kristianna nuna zu ṭhat lohna leh kan thlarau nun kawng atana a that lohna pastor-te’n min zirtirna pawh tûma khap thian a ni lo. Chief minister emaw Congress party khap tur a ni hek lo," an ti.