Zirtirtu natna khirh tâwk 78 hnenah Ṭanpuina Rs. 4,66,000 pek a ni

State Working Committee, National Foundation for Teachers Welfare chu nimin khan an chairman, School Education minister H Rohluna hoin an ṭhukhawm. July 2014 aṭanga June 2015 chhung­in zirtirtu natna khirh tâwk mi 78 hnenah Rs. 4,66,000 pek a nih thu tarlan a ni.

Meeting-ah hian kumina Teachers’ Day hman dan tur an rêl a; H Rohluna chuan, “Teachers’ Day hi zirtirtute pawimawhna inzirtirna atan leh chawimawina atana hman ṭhin a ni a, zirtirtute hi ram leh hnam tana zirlaite chhertu an ni,” a ti a; Teachers’ Day hlawhtling taka hman a nih theihna atan mawhphurhna nei zawng zawngte chu theihtawp chhuah turin a chah.

National Foundation for Teachers Welfare atana sum tuak dan ngaihtuah turin meeting-ah hian Sub-Committee din a ni a; kumin Teachers’ Day hman dan tur leh district tina mawhphurtu tur Committee-te an ruat nghal bawk.