MSU-in Chief Minister an kâwm

Mizo Students’ Union (MSU) chuan thuchhuah siamin, nimin khan chief minister Lal Thanhawla chu a pisaah hmuin, zirlaite mamawh leh an pawl hmalakna hrang hrang an sawipui tih an tarlang.

MSU chuan, Chief Minister chu October 2015-a RUSA hnuaia dan lo leh advertisement chhuah loa thawktu mi 23 lak chungchang sawipuiin, dik taka thawktu lak ṭhat a nih theih nana hma la turin an ngen tih an sawi a, “CM chuan he thil dik lo hi pawi a tih thu te, heti zat zat RUSA-in staff a la mamawh loh thu MSU hruaitute a lo hrilh,” an ti a; CM chuan dan ang taka kal a nih theih nan hmalak a tum thu a sawi niin an tarlang.

MSU tarlan danin, MSU hruaitute chuan CM Lal Thanhawla chu coaching academy chungchang an sawipui a, Mizorama coaching academy (civil services, medical, engineering) din turte’n sorkar aṭanga phalna neih ngaite an nei nge nei lo tih enfiah turin an ngen bakah, academy-te tan rules & regulations pangngai tak siam thuai turin an ngen a ni.