National Mission Programme zirho

UD&PA department chuan nimin khan Aijal Club-ah National Mission Programme chung­chang zir chianna hun an buatsaih a; khuallian, UD&PA minister Zodintluanga chuan, kawngpui siam leh in sak danah remruat­na mumal tak neih a ngaih thu a sawi.

Workshop hi UD&PA secretary Dr C Vanlal­ramsanga’n a kaihruai a; Zodintluanga chuan, “A tìr aṭangin Aizawl hi plan fel tak a awm loh avang­in kawngpui a chêp a, harsatna hrang hrang kan hmachhawn phah a ni. Tih sual lo awm tawh vanga insiam ṭhat nan kawngpui leh in sak danah remruatna mumal tak neih a ngai a, district lamah phei chuan hei hi an ngaih pawimawh a ngai,” a ti.

Khualzahawm, parliamentary secretary (UD&PA) Hmingdailova Khiangte pawhin thu sawiin, tumruhna leh beiseina neite’n hlawhtlinna an chan ṭhin thu a sawi a, “Kan hnathawhna kawng­ah rah ṭha zawk chhuah thei ngei turin rilru kan siam a ngai,” a ti.

Workshop-ah hian department hnathawh dan hrang hrang an zirho a ni.