Mizo ṭhalaite'n Taiwan ramah hna an thawh theih nan thuthlung ziak

Mizo ṭhalaite'n Mandarin (China ṭawng) an zir theih nan leh Taiwan-a hna an thawh theih nan Mizoram Youth Commission (MYC) leh TOP International Human Resources Management Consulting, Taiwan chuan nimin khan Aizawlah thawhhona tur, 'Letter of Intent (LoI) an ziak.

LoI ziahna inkhawm hi Labour, Employment, Skill Development & Entrepreneurship (LESDE) minister Lalnghinglova Hmar kaihhruaiin MYC Chairman pisaah buatsaih a ni a; MYC aiawhin chairman Malsawmzuala Ralte leh TOP International Human Resources Management Consulting aiawhin chairman Angus Shih ten hming an ziak a ni.

Thawhhona turah hian TOP International Human Resources Management Consulting, Taiwan-in MYC-ah Rs 50,00,000 an rawn pe dawn a, chumi hmang chuan MYC Aizawl Campus-ah Chinese ṭawng zirna, Mandarin Language Learning Centre din a ni dawn.

Mandarin ṭawng zir chhuakte chuan Taiwan-ah hna an thawk zel thei dawn a; Taiwan-a hna thawk turin Mizo ṭhalai 1,000 thawn tum niin, a bul ṭan nan mi 100 thawn phawt a ni ang. Chumi hnuah thawhhona tluantling, memorandum of understanding buatsaih zui tum a ni.

Sorkar thuchhuah tarlan danin, TOP International Human Resources Management Consulting hotute hian New Delhi-a zin chief minister Lalduhoma chu Mizoramah an rawn zui haw a; March 13, Ningani zan khan LESDE minister Lalnghinglova Hmar hoin Assembly House-ah hmalak dan tur leh thawhho dan turte an sawiho a ni.