Lirthei chesualah mi 2 thi, 2 hliam

March 13, Ningani tlai khan Khawruhlian dáiah Bolero MZ-01 P-6655 chesualin, kawng thlangah metre 200 vel a lum a, a chhunga chuang mi pahnih an thi a, mi dang pahnih an hliam.

PWD hotute aṭanga thu dawn danin, Bolero-ah hian PWD-a thawkte an chuang a, Khawruhlian khaw hnuaia a tlan laiin a kê a puak a, a khalhtuin thunun zo loin kawng thlangah a liam zui a ni.

Chetsualna hmunah PWD junior engineer Lalbiakzuala (39) s/o R Ramngaihzuala, Electric Veng, Aizawl leh lirthei khalhtu Lalnunmawia (43), Lungsei, Aizawl district (Aizawl Venglaia cheng mek) an thi.

Lirtheia chuang dang PWD executive engineer C Lalramzauva, Tlangnuam, Aizawl leh SDO C Vaninmawia, Champhai te an hliam a, damdawi-inah enkawl an ni.

PWD hotute hi hmàr lam tlangdungah sorkar hnathawh hrang hrang endikin an kal kual a, Aizawl pana an haw kawngah vanduaina an tâwk a ni.