Environment humhalh inzirtirna khârna Supreme Court judge pahnihin hmanpui

Mizoram State Legal Services Authority (MSLSA) buatsaih 'Public Education on Environment Protection & Conservation Laws, Climate Change and Sustainable Practices' campaign chu March 13, Ningani tlai khan Gauhati High Court, Aizawl Bench conference hall-ah khâr a ni a; Supreme Court judge pahnih Justice Sudhanshu Dhullia leh Justice Ujjal Bhuyan ten an hmanpui.

Campaign pual hian MSLSA chuan zirlaite pualin intihsiak an buatsaih a, campaign khàrnaah hian lawmman sem a ni. Justice Ujjal Bhuyan-a'n middle school leh high school zirlaite puala lemziak intihsiak lawmman a sem a, Justice Sudhanshu Dhullia-a'n college zirlaite puala essay inziahsiak lawmman a sem thung.

Justice Ujjal Bhuyan chuan, MSLSA chu kum tam tak chhung executive chairman anga a lo vil tawh thu a nih thu a sawi a, "He campaign aṭang hian ram humhalh kawngah nasa taka mipui an ṭhanharh tawhzia chiang takin a lang. Campaign chhunzawm hian sorkar thuneitute pawhin nasa taka hma an lak chhunzawm ka beisei," a ti.

Justice Sudhanshu Dhullia chuan, ram pum huapa campaign kalpui kaltlanga thil zir chhuahte chu khawvela ngaih pawimawh tur thil a nih thu a sawi a, "Tute pawhin sik leh sa, nungcha, ramngaw leh lui dungte humhalh chhunzawm kawngah mawh kan phur," a ti a; mimal, department leh sorkarte chu hma la chhunzawm zel turin a chah.

Inkhawmah hian Gauhati High Court judge pahnih - Justice Michael Zothankhuma leh Justice N Unni Krishnan Nair te pawhin thu an sawi a; District Legal Services Authority hma la ṭha bera thlan Lunglei DLSA hnenah lawmman hlan a ni bawk.

Supreme Court judge-te hian nimin khan TNT an tlawh a, MSLSA buatsaih ‘Sensitization on Legal Services to the victims of Drug Abuse and Eradication of Drug Menace’ an hmanpui. Vawiinah Aizawl District Court an tlawh leh dawn a ni.