KHAWTHLIR

Thisen pe

Adventist Youth Federation (AYF)-te chuan Global Youth Day pualin nimin khan hmun hnihah thisen unit 52 an pe. AYF-te hian Synod Hospital-ah thisen unit 40 pein, petute mipa 36 leh hmeichhia pali an ni a; mipa 11 leh hmeichhia pakhatte'n Siaha District Hospital-ah unit 12 an pe. Suangpuilawn Student Welfare-te'n Synod Hospital-ah thisen unit 4 an pe bawk.

Chanchin ṭha thlen ni

Mizoram Presbyterian Kohhran chuan vawiin hian Chanchin Ṭha Thlen Ni an hmang dawn a, tualchhung kohhran tam ber chuan zanah an hmang ang. March 15 hi Mizorama Pathian thu puang hmasatu Rev. William Williams-a'n Tlawng luia Kutbul lui chhuah a thlen ní a ni a, Mizoram Presbyterian Kohhran chuan kum 2014 aṭang khan Chanchin Ṭha Thlen Ni atan an hmang a ni.

Lo hâl hun tàwp

Mizorama hmun tam takah lo hâl a ni tawh a, vawiin March 15 hi kumina lo hâl hun hnuhnung a ni. Lo hâlna aṭanga vah bâk ram tihkan a nih loh nan district tina bawrhsapte chuan thupek an lo chhuah tawh. Hetih lai hian, hmunphiah hmun neite tan March 31, 2025 thleng lo hâl hun hawn a ni a; vawiin hian Union Home Minister a rawn zin dawn avangin Lengpui leh a chhehvelah vawiinah lo hâl phal a ni lo bawk.

CM leh AR hotu

Chief minister Lalduhoma chuan March 13, Ningani tlaiah khan Assembly House-a a room-ah Mizorama lo zin mek Assam Rifles director general Lt.Gen. Vikas Lakhera a kâwm a; Union Home Minister hoa Assam Rifles sawn chhuahna programme buatsaih tur chungchang leh thil pawimawh dangte an sawi dun a ni.

Mizoram hniam ber

March 13, Ningania Assembly session-ah Health minister Lalrinpuii chuan BJP member Dr K Beichhua zawhna a chhannaah, Food Safety and Standard Authority of India-in food safety chungchanga score a siamah kum 2024 khan Mizoramin tehna hrang hrangah point a hmu tih House a hrilh a, "Hmarchhak state dangte nen khaikhinin kan hniam ber," a ti.

MUP-te chawṭha zirtir

Mission Foundation Movement hnuaia Regional Resource Training Centre for Senior Citizens leh sorkar laipuia Ministry of Social Justice and Empowerment chuan nimin khan Venghlui Presbyterian Kohhran centenary hall-ah Venghluia Mizoram Upa Pawl member-te pualin 'Diet and Nutrition' zirhona an buatsaih. MUP member 50 an tel a, chawhnuah a thlawna inentirna buatsaih a ni bawk.