Action for Rivers Day hman a ni

Nimin kha International Day of Action for Rivers vawi 28-na a ni a, Mizorama a vawi khat nan Irrigation & Water Resources (IWR) department chuan an auditorium-ah an hmang a, IWR minister PC Vanlalruata'n a hmanpui. Day thupui chu 'Our Rivers, Our Future' tih a ni.

Minister PC Vanlalruata chuan, tui tel loin mihring leh thil nung dangte an awm thei lo tih sawiin, "Tui renchem, vawn thianghlim, tuihna humhalh leh bawlhhlawh tihtlem kawngah mi tinin mawhphurhna kan nei," a ti a; tui renchem leh humhalhah mi dangte entawn tlak leh zirtirtu nih tum turin kalkhawmte a chah.

IWR Minister chuan, hman khat daih sarâng (plastic) hman tlem leh thil ṭangkai siam chhuahna atana bawlhhlawh sawngbawl kawngahte hmalakna kalpui a pawimawh thu a sawi a, "Kan ram leilung hausakna humhalh tur hian nakin nghak loin, tun aṭang hian kan theihna zawn zelah pên chhuah a ṭul," a ti.

Action for Rivers Day hmannaah hian IWR chief engineer Lalrotluanga leh Save The Riparian president Romalsawma te pawhin thu an sawi a; Day puala buatsaih slogan, photography leh painting competition lawmman sem a ni.