HCS sum hman zinga a zatve vel Cancer leh Hepatitis-C tan hmang

Sorkar kum liam ta 2014-15 chhung khan Mizoram State Health Care Scheme (MSHCS) chuan damlo mi 7,843-te inenkawlna senso atan Rs. 12,35,32,722 a pe chhuak. Sum pek chhuah zinga Rs. 6,08,79,793 chu Cancer leh Hepatitis-C veite tana hman a ni a, sen zawng zawng zinga 49.28% a tling.

MSHCS-a inziak lut zingah Cancer leh Hepatitis-C veite tana sorkar sum sen a tam fál hle a, natna dang neite tana senso zawng zawng nen a inzat thuak a ni. MSHCS din tirh aṭangin Cancer leh Hepatiticis-C veite tan kum khata an sum senso zawng zawng zatve vel an la sêng ziah niin thawktute chuan an sawi.

MSHCS hotute chuan, Health Care Scheme (HCS) chu a taka hman theih a ni tih mipuiin an hriat zau zel avangin mipuiin an hlut zual hle niin an sawi a; natna langsar zual zingah - Cancer, Hepatitis-C, kal ṭha lo, lung ṭha lo leh ruh natna chi hrang hrang veite chu HCS hmangtu langsar zual an ni tih an sawi.
MSHCS-in kum 2014-15 chhunga damlo inenkawlna sum an pek chhuah Rs. 12,35,32,722 zinga Rs. 3,52,70,171 chu Hepatitis-C vei mi 222 tan an hmang a, 28.55% a tling. Sum sên tamna ber dawttu chu Cancer veite tan a ni a, Cancer vei mi 443 tan Rs. 2,56,09,621 an hmang a, chu chu 20.73% a ni.

Cancer leh Hepatitis-C ni lo natna dang zawng neite enkawl nan Rs. 6,26,52,929 hman a ni a, chu chu 50.72% a ni.

Kum 2014-15 chhunga HCS-a inziak lut mi 7,843 hnenah MSHCS chuan sum a pe chhuak a; chungte chu Mizoram chhunga inenkawl mi 7,262 leh Mizoram pawna enkawl ngai mi 581 an ni.

Cancer leh Hepatitis-C veite chu mi 665 an ni a; damlo zawng zawng mi 7,843 aṭangin 8.48% chiah an ni a, an pawisa hman zat erawh a sang fâl hle.

MSHCS hotute sawi danin, HCS-ah hiam damlote'n an inenkawlna senso zawng zawng an bill thei lo a, MSHCS-in rate an neih sa angin damlote MR bill chu an lo endik leh phawt a, chumi hnuah sum an pe chhuak ṭhin.

Kum 2014-15 chhung khan HCS-ah mi 66,037 an inziak lut a, chungte chu Below Poverty Line (BPL) chhungkua 50,020 leh Above Poverty Line (APL) chhungkua 16,017 an ni. Damlo MR bill an pek tawh hi mi 7,843 an ni a, inziak lut zawng zawng aṭanga tehin 11.88% an ni.

MSHCS hian HCS-a inziak lutte MR bill an buaipui bakah, Mizoram sorkar leh insurance company-te ṭang dunin an buaipui RSBY hnuaia inziak lutte MR bill pawh a ṭul angin an pui ṭhin a; sum pek chhuah erawh sorkar leh insurance company lamin an tih a nih avangin an hriatpui lo thung.

Kum 2014-15 chhung khan RSBY hnuaiah mi 29,039 hnen aṭangin MR bill an dawng a, chu'ng mite sum senso tarlan belhkhawm chu Rs. 16,19,03,314 a ni. Bill dawn aṭangin 23,359 pawm niin, Rs. 12,43,64,182 a ni. Bill hnâwl leh bill buaipui mek ṭhahnem tak a awm.

MSHCS hotute chuan, RSBY bik chu sorkar leh insurance company inkar a nih avangin sum an khawih loh thu an sawi.