KHAWTHLIR

Thisen pe
Chhinga Veng East Branch KṬP chuan an kum 14 tlin lawm nan Inrinni khan Synod Hospital tan thisen unit 36 an pe a, a petute mipa 33 leh hmeichhia pathum an ni. Lunglei Ramthar Veng Branch KTP pawhin Inrinni khan Lunglei Civil Hospital tan thisen unit 16 an pe a, a petute mipa 12 leh hmeichhia pali an ni.

Loneitute kâwm
Krishi Vigyan Kendra (KVK), Lawngtlai chuan Inrinni khan an complex-ah loneitute tan mithiam kawm theihna hun an an buatsaih a; thlai chîn dan, enkawl dan leh thil chi hrang hranga loneitute zawhnate chu mithiamte'n an chháng. Inkawmnaah hian Lawngtlai DAO H Joela'n chuan loneitu mi 30 hnenah thlai tui pekna a pe.

Mei zu 17 man
Serchhip Anti Tobbacco Squad-te chuan, Inrinni zing khan Serchhip Bazar leh a chhehvelah dan kalha mei zu an awm leh awm loh an vâi a, phal lohna hmuna mei zu mi 17 an man. Mei zu an mante hi vantlang hmuna mei zu leh taxi leh auto-rickshaw-a mei zute an ni a, pawisa chawitir an ni.

Vawk notê sem
AH&Vety deparment chuan, July 17-18, 2015 khan Mamitah NLUP second phase-a vawk vulh thlangtute hnenah vawk notê an sem. Vawk notê dawngtute hi chhungkua 523 an ni a, chhungkaw tinah vawk note pali ṭheuh pek niin, ni hnih chhungin vawk notê 2,092 sem a ni.

Car chesualah thi
July 18, 2015 zing dar 4 vel khan Maruti 800 car MZ-01 - 2025, Champhai aṭanga Aizawl pana tlan chu Tuikhurhlu bulah chesualin, kawng thlangah metre 154 vel a lum a; a hmunah motor neitu leh khalhtu Lalrivana (38) s/o Nangkhanthang, Champhai Zotlang a thi. Thu dawn danin, car-a chuang dang, Lalrivana fa nausen a hliam a, a nupui erawh a na vak lo thung.

Champhai leimin
Champhai SDO (Sadar) chuan thupek chuahin, Champhai dái, Chhungte khaw bula leimin chu ruah a sûr zel chuan nasa zawka min thei a ni tih a tarlang a, lirtheia veivâkte fimkhur turin a hriattir.