Parking fee rate tharah AMC-in Thla khatah Rs. 3,56,200 hmu dawn

Aizawl Municipal Council (AMC)-in July 1, 2015 aṭanga Aizawl khawpuia motor parking fee a tihsan avangin thla khatah Rs. 3,56,200 a hmuh belh tura chhût a ni a; parking fee rate hmasa aiin thla khatah Rs. 1,28,600-in a tam zawk.

AMC hotute chuan, Aizawla motor parking fee khawntu contractor-te'n AMC-ah an duh duh zat an chhûng lut lo tih sawiin, tender-a an chhànna zat ṭheuh an thehluh ngei ngei a ngai tih an sawi a, "Parking fee tihsan hi Parking Committee, member mi 15 awmnain an pawm a ni a, mimal thuneihnaa kalpui a ni lo," an ti. Parking fee pe duh lo chuan parking area-ah lirthei an dah phal a ni lo tih an sawi.

AMC hotute sawi danin, motor parking fee tihsan a nih hmain Parking Committee-in uluk takin an ngaihtuah a; Committee-ah chuan political party hrang hrang aṭanga AMC councillor pariat, AMC official, Transport department aiawh, Traffic SP leh Aizawl City Local Council Association president-te an tel. Committee chu April 13, 2015-ah an ṭhukhawm a, chumi hnua ṭum hnih an ṭhutkhawm leh hnuah AMC Board of Councillor meeting-in ṭum hnih a ngaihtuah a, June 4, 2015-ah BoC meeting-in a pawm ta a ni.

Parking fee rate thar siam a nih hnuah AMC-in parking fee khawn tur contractor thlan nan tender a chhuah a, chu chu a duhin an chhang a, tender chhangtute zing aṭangin contractor tur chu an thlang a ni. Contractor-te'n an chhanna zat azirin parking fee an khawn aṭangin AMC-ah thla khata thehluh tur zat an nei vek a; AMC-a an chhûn luh bak chu a khawntute chan a ni.

July 1, 2015-a hman ṭan parking fee rate tharah thla khata contractor-te'n AMC-a an chhun luh tur zawng zawng chu Rs. 3,56,200 a ni a; rate hlui­ah chuan Rs. 2,27,600 niin, rate hlui leh thar inthlauhna chu Rs. 1,28,600 a ni.

AMC hotute chuan, sumdawnna lirtheite chuan parking fee ni loin standard fee an pe tur a ni tih sawiin, "An pek duh loh chuan stand-ah an ding thei lo a, MV Act hmangin hrem tur an ni," an ti a; sorkar office zawng zawng pawhin an ram chin piah lamah chuan parking fee an chawi ngei tur a nih thu an sawi.

Parking fee tihsan chu lirthei chhuak tlem tura beisei vang a nih thu sawiin, AMC hotute chuan, "Parking fee hi chhûn leh zanah a hranga pek tura ruahman a ni a, zan lam chu local council enkawl tur a ni a, local council-te'n hmun remchang an ruahmanna hmunah chauh motor dah tur a ni," an ti.