CS hoin Smart City project sawiho

State Level High Powered Committee for Smart Cities Mission chu tun hnai khan an chairman, Lalmalsawma, chief secretary hoin an ṭhukhawm a; Aizawla Smart City project kalpui a nih dawn leh dawn loh an ngaihtuah.

Smart City project atan hian Aizawl khawpui chu Central-in tehna hrang hrang a siam­ah a tling a; Centrally Sponsored Scheme (CSS) hnuaiah dah niin, project sum chu Central leh state sorkarin a zatve (50:50)-a intum sem tura tih a ni. Chief Secretary hoa meeting chuan, funding 50:50 chungchang chu zir chian phawt an rél.

Meeting-a tarlan dan­in, Smart City project-in a tumte zingah - tui leh kawlphetha hnianghnâr taka sem, bawlhhlawh leh hnawmhnawk awmze neia chinfel, miretheite chenna tur buatsaihsak, information technology hman ṭangkai, khawpui chhung leh boruak vawn thianghlim, zirna hmun leh damdawi-in ṭha dinte a tel.

Project hi kalpui a nih chuan sorkar laipui aṭangin hna thawhna turin kum nga chhung cheng vbc. 100 vel Mizoram sorkarin a dawng ziah dawn a ni.