MNF-in pawisak nei loah Congress puh

MNF party chuan thuchhuah siamin, Congress party chu Synod Office aṭanga KṬP hming­a pastor hming list la chhuakah an puh.

MNF chuan, MPCC Media department-in 'Congress Thlifim' chan­chinbu July thla chhuak an tihchhuah hmain Synod Office-ah KṬP hmingin pastor-te hming list an dil chhuak niin an sawi a; an thil tih dan chu pawisak nei lote thil tih dan nia sawiin, politics khelh nana KṬP hming hmanga kohhran pisa bumah an puh a, pawi an tih thu an tarlang.

Congress party-in KṬP hminga pastor-te hming list an dìl chhuah hnu lawkah Congress Thlifim chanchinbuah pastor-te hêkna turin questionnaire an tichhuak zui niin an sawi a, "Politics hri ṭha lo, engtikah mah reh tawh ngai lo tur thil ṭha lo tak a ni," an ti. Questionaire chu Congress party-in an hriatpui loh thu an sawi chu mipui laka insawi thiam an tumnaa an ngaih thu an sawi bawk.

MNF party chuan, July thlaa 'Congress Thlifim' chhuakah Assembly session zawh taka zawhna leh chhannaa Aizawla cable TV lian pahnihte chhiah chawi dan tarlangin an sawisel niin an sawi a; hman deuhah pawh MPCC Media department-in cable TV-te chu vauin, an permit tihtawpsak thei an nih thu an hrilh niin an sawi bawk a ni.