Lunglei NGO-te'n Tennis Court-ah Police station thar sak an duh lo

July 18, 2015 khan Lunglei District MJA huaihawtin Lunglei NGO hrang hrangte'n Saikuti Hall bula Tennis Court awmna hmuna Lunglei Police Station building sak tum chu an sawiho a, an duh loh thu leh hmun âwl atana zuah an duh thu an puang.

Lunglei Press Club-a sawihona hi Lung­lei MJA president K Lalrinpuia'n a kai­hruai a; MJA chu presure group ni lo mah se, mipui ngaihdan leh pawl hrang hrang ngaihdan hriat theih nan inràwn khawmna an buatsaih thu leh, resolution siam zawnga buatsaih an nih loh thu a sawi.

Police DIG (Southern Range ) Joseph Lal­chhuana chuan, Lunglei tennis Court hmunah 13th Finance Commission aṭanga cheng nuai 216 an hmuh hmangin police station sak tum a nih thu a sawi a; building sakna tur sum pawh PWD-ah a awm tawh thu a sawi.

Joseph Lalchhuana chuan, Police department-in Lunglei khawpui chhungah police ram tam tak chu department dang eng emaw zat leh Lunglei Venglai mipui tan community hall sakna tur an lo pe tawh niin a sawi a; tuna Lunglei PS chu hun lo kal zel atan a him loh avangin Tennis Court awmnaah police station dang sak tura ruahman a nih thu a sawi.

DIG chuan, police-te chu mipui tana rawngbawltu an nih angin, khawi hmun aṭang pawha chêt chhuah a awlsam nan hmun lailía an awm a ngaih thu a sawi a; Lunglei District Tennis Association hruaitute nen AP Tlanga police ram chu Tennis Court siam nan an in­thleng thu sawiin, chuvang chuan tuna Tennis Court awmnaah police station sa turin rua­hmanna kalpui a nih thu a sawi bawk.

Lunglei Press Club-a inràwn khawmnaah hian NGO hrang hrang aiawhte chuan Tennis Court awmna chu police ram ni mah se, khawpui ṭhang zel turah khawpui lailía hmun âwl awm chu mi zawng zawng ṭhatna tur zawk a nih thu an sawi hlawm a; police station sak loh ni se an duh thu an sawi hlawm a ni.