KHAWTHLIR

Thisen pe

March 15, Inrinni khan KṬP, Phulpui Branch chuan an kohhran hall-ah thisen pek an huaihawt a, ZMCH tan thisen unit 55 an pe a, petute mipa 45 leh hmeichhia 10 an ni. Adventist Youth Federation (AYF)-te chuan Global Youth Day pualin Inrinni khan Champhai District Hospital-ah thisen unit 50 an pe a, petute mipa 44 leh hmeichhia paruk an ni. KṬP, Serchhip Vengchung Branch pawhin Serchhip District Hospital tan unit 21 an pe bawk.

Friendly match

Assam Rifles chuan March 15, Inrinni khan Siaha district-a Khaikhy khuaah 'Friendly Volleyball Match' an buatsaih a, Assam Rifles sipaite leh tualchhung mite'n volleyball hmangin intihhlimna hun an hmang. Friendly Volleyball Match hi AR sipaite leh tualchhung mite inṭhian ṭhatna atana buatsaih a ni a, mi ṭhahnem takin an chhim a ni.

Beer man

Kharzawl Branch YMA chuan nimin zing khan Mahindra pick-up, hnam dang khalh aṭangin beer bâwmpui (case) 38 an man. Lirtheiah hian Bagha, Assam mi nia inchhál pathum an chuang a, Kharzawl YMA chuan Excise & Narcotics department hnenah an hlan a ni.

ZORO-in ngen

Zo Re-Unification Organisation hruaitute chuan March 15, Inrinni tlai khan Union Home minister Amit Shah chu Raj Bhavan-ah an hmu a, January 1, 2025 aṭanga tihtawp tak India leh Myanmar mite inkalpawh phalna Free Movement Regime tihtawp chu ngaihtuah nawn leh a, hman phalsak leh turin an ngen. Myanmar leh India ram inrina hung an duh loh thu an thlen bawk a, "Indigenous people-te tan zalen taka inkal pawh hi UNO-in kan dikna chanvo min pek a ni," an ti. Manipur-a Zo hnahthlakte leh Meitei buaina avangin Zo hnahthlakte tan rorelna hran pek a ṭul thu an thlen bawk.

Mi 6,489 inziak lut

Kum 2024 chhung khan Mizoram Building & Other Construction Workers Welfare Board (MBOCWWB) hnuaiah mi 6,489 an inziak lut.