World Consumer Rights Day hman a ni

March 15, Inrinni kha World Consumer Rights Day a ni a, Mizorama district khawpui hrang hrangah hman niin, consumer-te dikna chanvo hrang hrang inhrilhfiahna hun hman a nih bakah, sumdawnna hmunte enfiah a ni.

Khawvel pum huapa consumer-te dikna humhalh tura hma latu inzawm khawm pawl, Consumers International bultumin kum 1983 aṭang khan kum tin March 15-ah thupui bik neiin World Consumer Rights Day hman ṭhin a ni a; kumina thupui chu 'A just transition to sustainable lifestyles' tih a ni.

World Consumer Rights Day hi Lungleiah chuan DC conference hall-ah bawrhsap Navneet Mann hoin hman a ni. Bawrhsap chuan, sik leh sa danglam zel leh khawvel changkang zelin mihringte khawsak phung a thlak danglam rualin, hriselna atan leh chhehvel khuarelin a tawrh loh nan khawsak thiam a pawimawh thu a sawi a, "Dawrah leh internet kaltlanga thil lei leh hman chungchangah mahni leh khuarel tana him tur ngaihtuah hmasak chu consumer-te mawhphurhna a ni," a ti.

Siahaah chuan World Consumer Rights Day pualin Siaha District Consumer Union hruaitute'n Siahatla Bazar an tlawh a; dawr hrang hrang tlawhin, bûkna an hmante an enfiah bakah, dawr neitute an kâwm.

Siaha District Consumer Union hruaitute chuan, Siahatla Bazarah hian dawr ṭhenkhatah bûkna dik tak hman a nih laiin, dawr ṭhenkhatah bûkna an hmante a tling lo deuhte tih an sawi a; dawr neitute chu bûkna dik tak hmang tura an chah bakah, mipuite chu thil bûk tling ngei an lei theih nan fimkhur turin an chah.

Champhaiah chuan Food, Civil Supplies & Consumer Affairs department buatsaihin IPR conference hall-ah hman a ni a, bawrhsap Mohammad Aaquib-a'n a hmanpui. DC chuan, "Kan thil neih sa tichhe lo zawnga hma kan lak a, nakina kan la mamawh leh tur tih hre reng chunga duat taka enkawl a pawimawh," a ti a; kumin Day thupui chuan nunphung nghet leh hrisel duhthlanna chu consumer zawng zawngte tana hman theih, hman tlak leh man tlawm zawka siam a ṭulzia a tarlang tih a sawi.

Kolasib-ah chuan FCSCA department leh Kolasib District Consumers' Union bultumin Kolasib Project Veng YMA Hall-ah Consumer Rights Day hman a ni a, district bawrhsap Robert C Lalhmangaiha'n a hmanpui.

Bawrhsap chuan, consumer-te hamṭhatna leh humhalhnaah sorkarin thâ a thlah thei lo tih sawiin, "Consumers union-te pawhin thâ an thlah thei lo. Ni tin thil lei leh hralh a awm reng a, mipui hi consumer kan ni vek a, he'ngah hian kan dikna leh kan chanvo kan hriat chian a ngai hle a ni," a ti a; dikna chanvo hriat loh vangin mipuiin harsatna an tawh fo thu a sawi.

Serchhipah chuan DC conference hall-ah additional DC Lalrinzuala hoin hman a ni. Lalrinzuala chuan, venhim ngaite tan dan siam a nih ṭhin thu sawiin, "Consumer-te laka dik lo taka chêt tum ṭhinte laka kan him tlan nan kan aw kan chhuah a ṭul," a ti.

Consumer Rights Day hi Lawngtlaiah chhuan District Consumer Protection Council bultumin DC conference hall-ah hman a ni a, SDO (Sadar) Margaret J Vanlalremmawii'n hmanpuiin, consumer-te tan harsatna thlenna tur District Consumer Protection Association a awm thu a sawi.

Mamitah chuan IPR conference hall-ah bawrhsap K Laltlawmlova hoin hman a ni. Bawrhsap chuan, "Kumin Day thupuiin a tum chu kan chhehvel leilung leh ramngaw nghawng nei tlem thei ang bera khawsak te, ei leh inah mahni mamawh tawka nun thiam te, mahni mamawh chin baka inhrêk thiam leh inrenchem thiamte a ni a, mi dangte nena nunho thiam leh khawtlang tana hnawksak loa nun thiamte a ni," a ti.

Saitualah pawh District Consumer Redressal Council huaihawtin Keifang Zawlbùkah hman a ni a; bawrhsap Dr Lalngura Tlau-in a hmanpui. Bawrhsap chuan, thil lei leh hralh chungchanga lungawi lohna neite'n District Protection Council-ah eng lai pawhin thlen theih reng a nih thu a sawi a, mipui tam ber chu consumer leh service provider ni kawp an nih avangin rinawm leh dikna nen hna thawk ṭhin turin a chah.

Khawzawlah chuan DC auditorium-ah Consumer Rights Day hman a ni a; khuallian additional DC Lalfakzuala chuan, "Mipui/consumer-te'n an dikna chanvo an hriat a ṭul a, thil dik lote tih dik a nih zel theih nan hma lak ngam a pawimawh," a ti.

World Consumer Rights Day hi Hnahthialah chuan Horeb conference hall-ah DCSO leh Hnahthial District Consumer Union bultumin hman a ni a; bawrhsap K Vanlalruati chuan, mi tin consumer an nih vek thu a sawi a, online hmanga inbumna tam lutuk laka fihlim turin mi tin a chah.