Minister-in tui lâkna leh Zawlpui a tlawh

PHE minister Prof. Lalnilawma chuan March 14, 2025 khan Aibawk, Sateek leh Phulpui khuate châwmtu Aibawk Water Supply Scheme tui lakna hmun a tlawh a, Cyclone Remal-in nasa taka a tihchhiat avanga ṭul zualte a theih ang anga fur thlen leh hmaa thawm ṭhat dan tur a en.

Aibawk Water Supply Scheme hi kum 2013-2017 chhungin Ministry of DoNER hnuaiah Non-Lapsable Central Pool of Resources (NLCPR ) hmanga siam a ni a; Jaal Jeevan Mission (JJM) hnuaiah kum 2022-2023 chhungin thawh chhunzawm a ni bawk. May 2024-a Cyclone Remal thawkin nasa takin a tichhia a ni. Minister hian Aibawk Plastic Waste Management Unit hmalakna a en bawk.

Horticulture minister Prof. Lalnilawma hian Serchhip Zawlpuia Horticulture department hmalaknate a hmunah a en a; Zawlpui phai aṭanga hlâwk zawka thlai thar theihna tura hmalak dan tur leh Mat lui kânna tur lei ṭha zawk dawh theih dan turte enpuiin, hmalak dan turte a sawipui.

Serchhip Zawlpui phaiah hian Mat lui km 9. vel a luang tlang a, Horticulture department-in kum tin zîkhlûm, tomato leh thlasik thlai dang ṭhenkhat chî (seed) an pe chhuak ṭhin a; chhungkaw 160 velin eizawnna atan hmangin, thlai hmun leh nûl an siam.

Horticulture department chuan kum 2024 chhung khan Zawlpui phaia thlai chingtute hnenah zikhlum chi bûr 100, tomato chi fûn 100 leh dawnfawh chi fûn 80 an pe a; central scheme hrang hrang hnuaiah tui lakna hmanrua eng emaw zat an pe bawk.

Zawlpuia thar thlai hralhna aṭangin kum tin cheng nuai 300-350 inkar an la lut ṭhin a, kumin 2025-ah hian cheng nuai 400 chuang an lak luh an inbeisei a ni.

Minister of state Prof. Lalnilawma hi Horticulture leh PHE department hotute'n an ṭawiawm a ni.