MZP-in an duhte Amit Shah an hrilh
MZP General Headquarters hruaitute chuan March 15, Inrinni tlai khan Union Home minister Amit Shah chu a thlenna Raj Bhavan-ah an hmu a; Mizoram zirlaite tana hmasawnna tur thil chi hrang hrang an sawipui.
Union Home Minister hnenah hian MZP chuan, Mizorama thingtlang khua, a bikin ramri hnaiha khaw hrang hrangah sikul tihchangtlun a ngaih nasat thu leh zirlaite'n harsatna an tawh ṭhinte an thlen. Amit Shah chuan, MZP thil thlen chu a pawimawh avangin state sorkar nen ṭang dunin hma an lak tur thu leh sum ngai turte chu sorkar laipui aṭangin theihtâwp chhuaha ngaihtuahpui a tum thu a lo hrilh tih MZP chuan an tarlang.
MZP hruaitute hian Mizo ṭhalaite centre service leh all India service-ah lut tlem hle tawh tih Home Minister hrilhin, Mizo zirlaite tan a bik tana ruahmanna siam tur leh coaching facility ngaihtuahsak turin an ngen. Minister chuan, MZP thil thlen chu lo en zui a tum thu leh Mizoramin coaching centre changtlung tak a neih theih nan hmalak a tum thu a sawi.
MZP hian Mizo zirlai, a bik takin thingtlang leh hmun kilkhawr zawka awm zirlaite tan national integration tour buatsaihsak turin an ngen a; India leh Myanmar ramri hung tumna leh Free Movement Regime (FMR) ṭhiah chu ṭha lo an tih thu an thlen bawk.