Lirtheia chetsualnaah mi pali an thi

March 14-16, 2025 chhung khan Mizoram hmun hrang hrangah lirtheia chetsualna avangin mi pali an thi a, mipa pathum leh hmeichhia pakhat an ni.

March 14, Zirtawpni khan Ṭawipui South bulah truck a chesual a, chetsualna hmunah hian a khalhtu Lalawmpuia (30) s/o Laldingliana (L), Zemabawk a thi. Truck-ah hian a khalhtu chauh a chuang a, a chetsual hun tak hriat a ni lo a, March 14 tlai dar 3 velah chuan mobile phone-in mi dangin an la bia nia sawi a ni.

Malsawmkimi (17), Chhiahtlang chu March 14 zan dar 7 vel khan Chhiahtlang Hmarvengah scooter (scooty)-a chesualin, kopang a sú a; Serchhip damdawi-ina lak a nih a nih hnuah Zoram Medical College & Hospital (ZMCH)-ah hruai a ni a, ZMCH thlenpui a nih hmain a hliam tuar loin a thi.

March 15, Inrinni zan dar 11 vel khan Lalnunhlima (19) s/o Khelmena, Thenzawl chuan C Lalrinsanga (36) s/o Duhthanga, Thenzawl chu an khuaah scooty-in a sú a, C Lalrinsanga chu ká chhawn lohin a thi.

Scooty khalhtu Lalnunhlima pawh na takin a hliam a, ZMCH-ah enkawl zui niin, nimin zing dar 4 vel khan a hliam tuar loin a thi a ni.