Red sanderwood tum 2,641 man tawh Saphu káwr man zinga kg. 292 a bo

Mizoramah red sanderwood tum 2,641 man a ni tawh a, chung zinga tum 1,839 chu Court-in a chhuahtir. Saphu káwr pawh Mizoramah kg. 834 man a ni tawh a, chu'ng zinga kg. 292 erawh chu an dahṭhatna aṭangin a bo thung.

Environment & Forest (E&F) minister Lalrinmawia Ralte-in nimina Congress Bhavan-a a sawi danin, kum 2009 vel aṭang khan Mizoram kaltlangin red sanderwood tawlhrûk a ni tih hriat ṭan a ni a; E&F division pa­thum - Aizawl, Champhai leh Kolasib aṭangin tum 2,641 man a ni tawh. An man zinga tum 1,830 chu Aizawl District & Session Court-in June 27, 2011-ah chhuahna order a pe.
Court thupek avang hian Zema­bawka central godown aṭangin red sanderswood tum 1,830 chu a neitu nia inchhálte'n zanah a kalhna chhu chhiain an la chhuak a, chu chu E&F department-in a hriatpui lo. Court-in a chhuah loh zawng tum 802 chu E&F-in an la kawl a ni.
Lalrinmawia Ralte chuan, October 8, 2014 khan Ministry of Environment & Forest-in red sanderwood mante chu Andhra Pradesh-a thawn let tur leh thawnna sênsote pawh Andhra Pradesh sorkar rulh leh tura hriattir turin Mizoram sorkar a hrilh niin a sawi a, "Department chuan a man leh dahṭhatna vela kan senso tawhte kan zuk hrilh leh a ni," a ti.
An thu thlen bawhzui hian Red Sanders Anti-Smuggling Task Force hotupa chu Mizoramah rawn kalin Red sanderswood-te hi an rawn endik tawh a; Red Sanders Anti-Smuggling Task Force lamin hmalak zel dan tur an la rawn hriattir dawn niin E&F minister chuan a sawi.
Saphu chungchang sawiin Lalrinmawia Ralte chuan, "Saphu hi Wildlife Protection Act, 197 hnuaiah Schedule 1 animal a ni a, man, thah, khàwi, sumdawnna atana hman khap tlat a ni. India ram pumpuiah he ramsa hi a awm a, mahse central India leh hmarchhaka awm hi a danglam deuh hret," a ti.
E&F Minister sawi danin, Sa­phu káwr hi Chinese traditional damdawi atan hman a nih avangin Mizoram kaltlangin Myanmar lamah tawlhruk ṭhin a ni. Kum 2012 aṭangin ṭum ruk, a vaiin kg. 848 man a ni tawh. Ṭum hniha man (kg. 258) chu Court Malkhana-ah dah a ni a, ṭum khata man (kg. 245) chu Court thuchhuak angin hâl ral a ni.
Court Malkhana dah leh hâl ral bâk zawng, kg. 304 chu Forest kudamah dah a ni a, chung zinga kg. 292 chu rûkbo a ni. Saphu káwr rukbo thuah hian FIR thehluh a ni a, police-in an chhui mek.
Lalrinmawia Ralte chuan, June 11, 2015-a Farkawn bus aṭanga Saphu káwr an man chu Kolasib aṭanga kal a ni mai thei tih sawiin, "A neitupa nia sawi man a la nih loh avangin tunah chuan khawi aṭanga lo kal nge tih hriat a harsa," a ti a; Saphu káwr bo chungchangah E&F department mi inrawlh an awm a nih chuan Court-in an thu a ngaihtuah bakah, department pawhin an chungthu a ngaihtuah tur thu a sawi.