Kohhran hrang hrangte'n Yoga an sawiho

Mizoram Kohhran Hruaitute Committee (MKHC) chuan nimin khan Mission Veng Koh­hran biak-inah Yoga chungchang zirhona an buatsaih a; kohhran pawl hrang hrang aṭangin aiawh mi 279 an tel.

Seminar on Yoga hi chawhma lamah MKHC chairman Rev Lalrinmawia'n a kaihruai a, MKHC executive member Rev B Sangthanga'n MKHC paper buatsaih a chhiar. Chawhnu lamah MKHC vice chairman VL Bela'n a kaihruai a, sawiho tur hlawm pali leh Yoga kaihhnawih thil dangte sawihona a ni.

Kal khawmte chu pawl pakua­ah insiamin an sawiho a, an sawihonate chu chhinchhiah niin, MKHC-in an meeting leh hunah bawh­zui dan tur an ngaihtuah ang.

MKHC general secretary Rev. R Lalrinsanga chuan, Yoga chu a him lo an tih rualin, a chungchanga hmalak dan turah fimkhur taka kal a ngaia an hriat thu a sawi a, "Yoga hrim hrim hi a him lo kan tih rualin, sakhaw dang beihna ang zawnga a kal a hlauhthawnawm a, chuvangin mi tinin an hriatthiam theih tur zawnga kalpui dan tur kan ngaihtuah ang," a ti.