School Education leh DDK-in thuthlung ziak

School Education depart­­ment leh Doordarshan Kendra, Aizawl-te chuan nimin khan School Edu­cation minister H Rohluna pisaah thawh dun­na thu­thlung an ziak.

Inremna ang chuan, DDK-ah kar tin vawi khat School Edu­cation department-in zirna chawikanna lam hawi programme darkar chanve chhung an nei ṭhin ang.

Minister H Rohluna chuan, "Doordarshan nena thawh dunna tur hi Mizoram sorkar leh School Education department tan hmasawnna méllung pawimawh tak, zirna tihhmasawnna tura thil ṭang­kai tak tur a ni. Zir­laite hnena zirna pek piah lamah department hmalakna pawimawh zualte mipuite hnena pho­chhuahna tur a ni," a ti.

Parliamentary secretary Joseph Lalhimpuia pawh­in thu sawiin, tunlai thiam­na leh media-te chu a ṭha zawnga hman thiam a pawimawh thu a sawi a, "Doordarshan nena thawhhona hi thingtlang lama awmte'n nasa takin an chhawr ṭangkai thei dawn a ni," a ti. School Edu­cation department-a hna hrang hrang - SSA, Midday Meal, RMSA, SCERT-te hnathawh a ṭhat leh ṭhat loh mipui hmaah pholan a nih dawn thu a sawi.

PIB deputy director Mangjangam Touthang chuan, thawhhonna chuan thil ṭha tak a thlen ngei a rin thu a sawi bawk.

Thawh dunna thu­thlungah hian School Educa­tion depart­ment aiawhin secretary Manisha Saxena-i'n hming a ziak a; DDK Aizawl aiawhin programme head Ramsan-a'n hming a ziak.