KHAWTHLIR

Thisen pe
KM Higher Secondary School NSS-te chuan, nimin khan an sikulah blood donation camp an buatsaih a, Aizawl Civil Hospital tan thisen unit 87 an pe a, a petute mipa 70 leh hmeichhia 17 an ni. Academy of Integrated Christian Studies pawhin nimin khan Aizwl Civil Hospital-ah thisen unit 37 an pe a, a petute mipa vek an ni.

Thiin chhar
Francis Lalzothanga (21) s/o Lalhmangaiha, Model Veng chu nimin zing khawvar hma dar 3 vel khan Aizawl New Market building thar thlangah thia chhar a ni a, Aizawl Civil Hospital-ah enfiah a ni.

Jail-a thawkte lawm
Mizoram Jail Employees Association, Lunglei Branch chuan thuchhuah siamin, Lunglei West bialtu MLA Chalrosanga Ralte-in Lunglei District Jail mamawh hrang hrang a tihsak avangin a chungah an lawm thu an tarlang a, "A hmalaknain jail panna kawng siam a ni a, pipe line thlak vek niin, Urban Health Centre pawh complex chhungah dah a ni," an ti.

Zu rûi 137 man
Excise & Narcotics department chuan June 2015 chhung khan zu zuar 156, zu rûi 137, rakzu litre 3790.87, sapzu ûm puitling 1,378 an man a; zu kaihhnawiah lirthei pakua an man bawk.

IMR-MMR zirho
Health department buatsaihin nimin khan Lawngtlai DC conference hall-ah nausen kum khat hnuai lam thihna leh nau chunga nu thihna tihhniam leh pumpelh nana hmalak dan tur inzirtirna buatsaih a ni a; kohhran lejh tlawmngai pawl hrang hrangte aiawhte leh sorkar official-te an tel.

Chite lei khâr
Bethlehem Vengthlang mawng aṭanga Zemabawk lama kal kâina, Chite lui chunga lei dawh chu a chhuat a him loa hriat a nih avangin nimin tlai aṭang khan lei hi khâr a ni. PWD hotute chuan, lei hi a chhuat a pawp a, a khi nual bawk niin an sawi.