I League thlen theih ngei kan tum: Thanzara
Minister Lal Thanzara chuan, Rajiv Gandhi Stadium chu I-League khelhna tlak tura chei tum a nih thu a sawi a, "RG Stadium thawm ṭhat hna zawh fel hnuah Mizoramin I League thlen ngei kan tum ang," a ti.
Lal Thanzara hian nimina Ṭhuamluaia Mual, Lungleia HPC Cup vawi ngana final khelh hmaa inkhawmah thu sawiin, Mizote'n infiamnaah hmasawnna nasa tak kan hmu tih a sawi a, "Kan hmasawnna hi Pathian malsawmna a nih rualin, infiamnaa tui Chief Minister leh Sports Minister kan neih van a ni," tiin, anni pahnih avangin Mizote kan vanneih thu a sawi.
MFA president Lal Thanzara chuan, football-ah phei chuan Mizoram Premier League buatsaih a nih hnuah Mizo footballer-te'n nasa takin hma an sawn ti a sawi. January-a I League khelh hunah India player ṭhate Mizoramah an khel ve thei dawn tih a sawi a, "Hei hi Mizo football history-ah a vawi khatna a ni," a ti.
Lal Thanzara chuan, ram pum huapa football club liante inelna ISL-ah Mizo football player 12 an tel thei tawh tih a sawi a; Kum 2017-ah India-in FIFA U-17 World Cup a thlen turah India team-a tel tur player an thlan tawhte zingah Mizo naupang pathum an tel thu leh, naupang dangte pawh enchhin zel tum a nih thu a sawi bawk.
Minister hian MFA hmingin Lunglei District Football Association hnenah football pathum leh assistant referee flag set khat a pe.
5th HPC Cup 2015 khârna inkhawm hi Lunglei HPC vice chairman S Laldingliana, MLA-in a kaihruai a; final-ah Electric Veng-in Zotlang chu 3-2 a hnehin an champion a ni.