Hawla'n zu leh sikul hun sawi duh tawh lo Cong Thlifim party ngaihdan ni lo - Hawla

MPCC president Lal Thanhawla chuan nimin khan Congress Bhavan-ah thu a sawi a, "Zu zawrh chungchang leh sikul kai hun tihhma hi sawi sawi a ṭul tawh lo," a ti.

Lal Thanhawla chuan, zu zawrh leh sikul ṭan hma chu a nih tur anga kalpui mawp mawp a ni tawh tih sawiin, "A ṭhat leh ṭhat loh chu hunin a hril dawn. Kan hruaitute'n an lo sawi tawh angin, a ṭha lo a nih chuan kan chhunzawm lo mai dawn a ni," a ti a; Congress party mite chu zu leh sikul kai hun sawi sawi tawh lo turin a chah.

Congress party chan­chinbu 'Congress Thlifim' a pastor zinga sorkar hmalakna do thlanna tur dah tel a nih chung­changah MPCC President chuan, "Ṭhahnem­ngaihna vanga thil tih a ni. Congress kalphung leh ngaihdan a ni lo tih hria a, chanchinbu publisher-te'n bànna thehluh nacháng an hria hi a lawmawm hle. Bànna an thehlut ngam hi party hmangaih vang a ni a, an fakawm a ni," a ti.

Supply minister John Rotluangliana pawhin thu sawiin, Mizoram chu India rama mipui zaa zain ration buhfai an dawnna state awmchhun a nih thu a sawi a, "Food Security Act hi kan hlâwkpui ve dawn loh avangin a theih chin chinah pumpelh kan tum a, tunah hian loh theih lohna vangin October 2015-a hman ṭan turin kan buaipui mek a ni," a ti.

John Rotluangliana chuan, Food Security Act-in a huam loh tur tam tak an awm dawn tih sawiin, chu'ng mite tan chuan ration an dawn chhunzawm theih nan Mizoram sorkarin hma a lak thu a sawi bawk.