PUC-in zirlai thar leh zirlai pass an lawm

Pachhunga University College chuan, nimin khan Mizoram University multipurpose hall-ah an college-a zirlai lut tharte lawmna leh Mizoram University result chhuaka an zirlai tiṭhate chawimawina hun an hmang.

Inkhawm hi PUC vice principal Prof. JV Hluna'n a kaihruai a, principal Dr Tawnenga'n thu a sawi. Dr Tawnenga chuan, hlawhtlinna kawng ṭha ber chu mahni inthununna a nih thu sawiin, "Pathian pawhin mi taimate leh mahni tana beih nacháng hriate pui turin a bán zau takin a phar ṭhin a ni," a ti.

Kumin July thlaa MZU degree course result chhuakah khan subject tiṭha (rank holder) 188 zinga 98 (52.12%) chu PUC zirlai an ni a; department 22 zinga 16-ah PUC-in topper an nei bawk.

Rank holder ni phak zirlai 98 hnenah chawimawina thuchei leh pawisa an pe hlan a; Science subject-a mark hmu sang ber Hmingsangliana, Mathematics hnenah Dr H Lallungmuana Award, Arts-a mark hmu sang ber Vanlalpeka, Sociology hnenah HK Bawih­chhuaka Award an hlan.

PUC-ah hian department 22 awmin, zirtirtu 105 an awm mek a; kuminah zirlai lut thar Arts-ah 481, Science-ah 401 leh Commerce-ah 65, an vaiin 947 an awm a, a pumpuia zirlai zat chu 2,160 an ni.