Duhoma'n pastor-te vauah Congress a puh

ZNP president Lalduhoma chuan Congress kaihhruai sorkar chu NLUP hmanga mi retheite vau betah puhin, "An zalenna leh duhthlanna hmang thei loin an siam a, tunah pastor-ho an vau leh ta a nih hi," a ti.

Lalduhoma hian nimin khan ZNP party office-a inkhawmah thu a sawi a; sorkarin zu a khap lai khan kohhranin zu a do ngai lo a, a theih ang angin a thlâwp reng zawk ṭhin tih sawiin, "Tun hma daih aṭang tawhin kohhranin a do chu zu khap ni loin, zu zawrh a ni," a ti.

ZNP President chuan, mi ṭhahnem­ngai sang télte'n bingbileta simna thu an au chhuahpui laiin, sorkar lai Congress party chuan zu zawrh dodaltu pastor thlan chhuah an tum nia sawiin, vanduaithlak a tih thu leh Mizorama thil la awm ngai lo a nih thu a sawi.

Lalduhoma chuan, Congress sorkar hotute chu Kristian ni lo, sakhaw dang thil tih ṭhin ti ve mai ṭhinah leh kohhran hmusitna, tihelna leh chona ṭawngkam déngkháwng tak tak sawi ṭhinah a puh a; chu'ngte bakah tuna zu zawrh dotu pastor-te hming khawn khawma chhinchhiah hial an tum chu ‘Sakawlh' a nam hiala a hriat thu a sawi.

Congress Thlifim chanchinbuin zu zawrh dona thu sawi tam pastor thlanna tur a tihchhuah vanga MPCC Media Cell chairman leh secretary-te Congress Thlifim publisher an nihna aṭanga bànna an thehluh chungchangah Duhoma chuan, Editorial Board member nihna, MPCC Media Cell-a an nihna leh party-a an nihna dangte erawh chu an bànsan lo niin a sawi.

ZNP President chuan, kohhran leh sahriak do chu an ro tual tual nia sawiin, "Ran thi tur chalchâng hi an tâl buan buan ṭhin, hnaih loh tur a ni, en ringawt ila an zal thuai mai," a ti a; mipuite chu Congress party aṭanga inthiar fihlîm turin a chah a ni.