Mipuia hripui darh chak lutuk tur Vèn nan lockdown a ṭul leh ṭhin - Health Minister
Health minister Dr R Lalthangliana chuan nimin khan thuchah tichhuakin, 'Community spread kan pumpelh thei dawn chuang lo, in lockdown hi a ṭulna eng nge awm' tih zawhna a awm theih thu a sawi a, "Mipui zinga hri kai darh chak lutuk tur vènna atan tal pawh lockdown zeuh zeuh a ṭula hriat a ni," a ti.
Health Minister chuan, Mizoram chu health infrastructure lama pachhia a nih avang leh mihring tlemte awmna a nih avangin mipuia hripui darh huk chu state-in a zo dawn loa a lan thu sawiin, "Hri danna hmuh chhuah a nih hma chu kan theih ang anga fimkhura kan invèn a ṭul dawn. Hri kai kan pung chak deuha a lan chánga hetia kan lockdown hian mipui zinga darh chak lutuk tur kan veng thei ṭhin," a ti a; tawnhriat aṭangin lockdown-in awmzia nasa takin a nei tih a lan thu a sawi.
Covid-19 veite enkawlna tur dedicated covid hospital, SRH-ZMC chu hripui vei na deuhte enkawlna tura ruahman a nih thu sawiin R Lalthangliana chuan, "Kan la indaih deuh avangin positive serious vak lote pawh kan la indah thei rih. Serious kan ngah deuh chuan serious vak lo kan tih mild leh moderate kan tih maite bakah, mahni inringhlelte awm lailawkna turin district tinah dedicated covid health centre (DCHC) kan ruahman a, hengte hi Covid-19 veite oxygen hmanga enkawl theihna hmun a ni," a ti.
Health Minister sawi danin, DCHC chu Aizawlah panga, Mamitah pahnih leh district dang zawngah pakhat ṭheuh a awm a; chung DCHC 16-ah chuan khum 166 a awm.
Dr R Lalthangliana chuan, Covid-19 veite an nat dan a danglam sâwt tih sawiin, "October hma lam kha chuan positive kan neih zinga 15% hi natna lang chhuak an niin, 85% zet kha natna lang chhuak lo an ni. Tun thlaah chuan tukin result kan hriat thleng khan Covid-19 vei 485 hmuh chhuah tawh a ni a, chung zinga mi 166 (34.23%) chu natna lang chhuak an ni," a ti a; doctor-te sawi danin, symptom lan hnua endikte chu an taksaah virus hnathawh a nasa hman tlangpui tih a sawi.
Aizawla local council 83 zinga local council 45-ah hripui vei an awm thu sawiin Minister chuan, "Chung zingah chuan zirlai 28, zirtirtu pakua leh non-teaching staff pali an awm. Positive kan neih tharte awmna veng hi a darhsarh êm avangin hripui hian kil tin a luhchhuah niin a lang. Damdawi-in OPD-a inentir turte zingah positive hmuh belh zel a ni. Vawi duailo kan ṭhukhawm a, theihtawp chhuahin kan hotute'n ngaihtuahna an seng a ni," a ti.
Dr R Lalthangliana chuan, Chief Minister remtihnain Mizoram pumah ni 14 awh tur Covid-19 No Tolerance Fortnight chu hman a nih thu sawiin, "Tun hnai ni li chhungin AMC area-ah positive kan pun belh nasa viau a, community spread a awm tawha ngaih theihin kan inkài darh a ni," a ti a; chuvang chuan minister, chief secretary, officials, tlawmngai pawl, kohhran leh medical association hruaitute meeting thurel CM-in a pawm hnuin Aizawlah lockdown puan a nih thu a sawi.
Health Minister chuan, mipuiin sorkar an thlàwp ṭhat avangin lawmthu a sawi a, "Hripui hi khawvelin a la zir chian mek a ni a, kan la bel lo a, a do dan turah pawh rorel thiam a har hle. Vawiina ṭha taka kan hriat kha a tûk lawkah a ṭha lo leh a, kan rorelna leh hmalak tawhnaah tihsual tam tak kan neiin ka ring. Khangahte khan in rilru kan hliam palh emaw, kan tina palh a nih chuan thinlung takin in ngaihdam ka dil a ni," a ti.