Covid-19: Mizoram dinhmun Hripui vei 34 hmuh belh a ni

October 26, Thawhṭanni khan Mizoramah Covid-19 vei mi 34 hmuh chhuah a ni a, mipa 20 leh hmeichhia 14 an ni. Nimin khan hripui laka fihlim tawh mi 12 chhuahtir an ni thung.

Covid-19 vei Thawhṭannia hmuh chhuahte chu - ZMC laboratory-a hmuh mi 14, TrueNAT-PCR Siahaa hmuh mi pakhat leh Mamita hmuh mi pahnih, Rapid Antigen Test (RAT) hmanga Aizawl district-a hmuh mi 16 leh Lawngtlaia hmuh mi pakhat an ni.

Nimin khan Covid-19 laka fihlim tawh mi 12 chu enkawlna hmun aṭangin chhuahtir an ni a; SRH-ZMC aṭangin mi pathum, Kolasib CCC aṭangin paruk, Champhai, Serchhip leh Hnahthial CCC aṭangin mi pakhat ṭheuh an chhuak.

Mizoramah Covid-19 positive mi 2,527 hmuh chhuah tawh a ni a, mipa 1,998 leh hmeichhia 529 an ni. An zinga mi 2,224 (88.01%) chu chhuahtir an ni tawh a, enkawl mek mi 303 (11.99%) an awm.

October 26, Thawhṭanni khan Mizoram hmun hrang hrangah mi 1,762-te swab sample endik a ni a; ZMC laboratory-ah RT-PCR hmangin sample 798, district pathumah TrueNAT-PCR hmangin sample 96 leh RAT hmangin district pangaah sample 868 endik a ni.

Covid-19 vei October 26-a hmuh chhuah mi 18-te chu Aizawl district-a mi vek niin, mipa 8 leh hmeichhia 6 an ni a; Mizoram chhunga kái chhâwng mi 11 leh state páwn aṭanga rawn lut mi pathum an ni. An zingah nausen thla 10 mi pakhat, naupang kum 6 leh kum 8 mi an tel a; a bak chu puitling vek niin, a upa ber chu kum 57 a ni.

ZMC-a hmuh chhuahte chu - Salem Veng (Mualpui)-a Muanna Ina awm mi pasarih (M-3, H-4), Durtlang Leitan veng mi pahnih (M-1, H-1), Chanmari (H-1), Ramhlun South (M-1), Tuivamit (M-1), Selesih (M-1) leh Hotel Landmark, Bawngkawna cheng (M-1) mi pakhat ṭheuh an ni. Tuivamit, Selesih leh Hotel Landmark-a mite hi tun hnaia Tripura, Assam leh Madhya Pradesh aṭanga rawn lut an nih thu sorkar thuchhuahin a tarlang.

Sorkar thuchhuah tarlan danin, Siaha District Hospital-ah TrueNAT-PCR hmangin Covid-19 positive mipa kum 40 mi, Assam Rifles sipai hmuh chhuah a ni a; hnam dang ni mah se, tun hnaiah Mizoram pawnah a chhuak lo a, Lunglei leh Parva khuaah a zin thung. Mizoram chhunga kai chhawng niin, Covid-19 symptom nei a ni.

Mamit District Hospital-ah pawh hripui vei pahnih, mipa kum 29 leh kum 46 mi hmuh chhuah a ni. Kum 46 mi hi Vawngawnzo khuaa chêng, tun hnaia Aizawla zin a ni a, Mizoram chhunga kai chhawnga ngaih a nih bakah, symptom nei a ni. Kum 29 mi chu Damdiai khua, tun hnaia Tripura aṭanga rawn haw, community quarantine facility-a inkhung lai a ni a, Covid-19 symptom a nei lo.

Rapid Antigen Test hmanga Covid-19 vei hmuh chhuah mi 17-te chu Mizorama kái chhâwng 15 leh state páwn aṭanga rawn haw mi pahnih an ni. An zingah nausen thla 3 mi a tel a, a upa ber chu kum 87 a ni thung.

RAT hmanga Aizawl khawpuia hripui vei hmuh chhuahte chu - Rosebud School-a zirlai pahnih, Laipuitlanga hmeichhia kum 16 leh Ramhlun Vengthara kum 15 mi te, Staines Memorial School-a zirlai pathum (M-2, H-1) kum 16 mite (mipa Kawnpui leh West Phaileng, hmeichhia Buarpui), Laipuitlang (M-1), Dinthar  (M-1), Electric Veng (M-4, H-2)-te an ni.

Lengpui Airport-ah Kolkata aṭanga rawn haw, Chanmari venga nupa, mipa kum 36 leh hmeichhia kum 32 hmuh chhuah a ni a, symptom an nei lo. Khawruhliana hmeichhia kum 32 mi leh Lawngtlaia hmeichhia kum 37 mi hmuh chhuah a ni bawk.