Covid-19 darh mek chhut chah nan Aizawlah khuahkhirhna kalpui ṭan

Mizoram sorkar chuan nimin zing dar 4:30 aṭang khan Aizawlah khauh zawka khuahkhirhna a kalpui leh ṭan a, Aizawl khawlaiah mipui veivâk an tlém hle. He khuahkhirhna hian November 3, Thawhlehni zing dar 4:30 thleng a awh dawn.

Sorkar (DMR department) thuchhuah chuan, tun hnaiah Aizawlah Covid-19 hri vei an pung chak hle a, an zinga tam tak chu an kàina chhui chhuah theih loh leh natna lang chhuakte an nih thu a tarlang a, "Kai enkawl mek zingah dinhmun ngaihtuahawm takte an awm bawk. Chuvangin, vantlang zinga Covid-19 darh zel thei laka invèn nan inkhuahkhirhna khauh zawka kalpui a ṭul ta a ni," a ti.

Aizawla inkhuahkhirhna kalpui dan tur hi sorkar chuan October 26, Thawhṭanni zan dar 11:30 vel khan a tichhuak a; he inkaihhruaina hian AMC huam chhung bikah chuan September 30, 2020-a 'Unlock' kaihhruaina chhuah leh 'Covid-19 No Tolerance Fortnight' chungchanga October 23-a order chhuah tawhte chu a luahlàn a ni.

Inkhuahkhirhna atana kaihhruainate chu a hmaa inkhârkhip (lockdown) kalpui tawh ṭhina mite nen a inang tlangpui a; kohhran zing ṭawngṭai inkhawm pawh phal a ni tawh rih lo. Damdawi-in OPD leh clinic-te khâr niin, emergency/casualty erawh hawn a ni thung a; mitthi vuina leh inneih inkhawmah mi 35 aia tam awm khawm phal a ni lo.

Thupek tihchhuahah hian kalphung chi hrang hrang tarlan a ni a; thupek zâwm lo chu Disaster Management Act, 2005 Section 51-60, The Mizoram (Containment & Prevention of Spread of Covid-19) Act, 2020 Section 5 leh IPC Section 188 hmanga hrem theih a nih thu a tarlang.

1.    Lengpui Airport hawn chhunzawm a ni a. Airport kaltlanga Mizoram lut turte mCOVID-19 mobile application-a mFlight emaw, mcovid19.mizoram.gov.in ah mpassFLIGHT hmangin an inhriattir hmasa tur a ni.

2.    Aizawl páwn lam aṭanga AMC chhunga luh leh Aizawl aṭanga zin chhuah khap a ni a, tuhpek awm hmaa zin laklawh tangkhang lut leh chhuak tur, task force hriatpuina lehkha neite a huam lo. Home hriatpuia Mizoram lirtheia lut te, dam lohna (medical emergency) leh chhiattawh thila chhungkhat hnai zual (pi, pu, nu, pa, tu leh fa leh pianpui unau) LTF hriatpuinaa zin chhuah phal a ni.

3.    State páwn aṭangin Aizawlah bungraw lak luh leh phuah chhuah theih. Bungraw thiar chungchangah DC-in ruahmanna a siam ang.

4.    Ni tin mamawh ei tur leh damdawi zawrhna dawrte DC leh LTF-te ruahmanna siam angin hawn ṭhin a ni ang. Dawrkaite’n anmahni dawrtute hman tur hand sanitiser dan kawl tur a ni a, social distancing zawm tur a ni. Anmahni dawrtute hming, veng, phone number leh a hun ziahna register ṭha takin an vawng tur a ni. Damdawi dawr tih loh dawr dang zawng chu tlai dar 4:30-ah khâr tur.

5.    Zirna-inte leh inkhawmna hmunte khâr tur a ni a, zing ṭawngṭai inkhawm phal tawh pawh tih rih loh tur a ni.

6.    Damdawi-in OPD leh clinic-te khâr a ni a, emergency/casualty hawn a ni thung.

7.    Mitthi vuina, inneih inkhawm leh lawmnaah mi 35 aia tam pun khawm phal a ni lo a, man hlannaah mi 15 aia tam tel phal a ni lo.

8.    Phalna la hmasa loin mahni in leh a hung chhung chhuahsan loh tur. Hei hian a hnuaia mite hi a huam lo a, an chhuak a nih chuan photo identity card an keng ngei tur a ni.

i)    Sorkar hnathawk duty-te: Health, Home (Police, Home Guards, Fire, Prisons, Forensics), DMR, FCSCA, Civil Aviation, Excise & Narcotics, IPR leh PWD/PHE/P&E/AMC-a essential service.

ii)    Department secretary/head-te’n hna ṭul zual bik thawk tura pisa kai tura an ruatte.

iii)    Local task force member leh volunteer-te.

iv)    State Election Commission leh MPSC-a thawk duty-te.

v)    Central sorkar/PSU/PSE office-a thawk duty-te.

vi)    Medical leh veterinary emergency duty leh damdawi-ina thawkte.

vii)    Kohhran hminga motor register hmangtu kohhran hruaitute.

viii)    RBI, bank, ATM, insurance, post office, telecom service provider duty-te. 

ix)    Print & electronic media, cable TV leh internet service-a thawkte.

x)    Bawnghnute sem leh bawlhhlawh paih hna thawkte.

xi)    Petrol pump leh LPG delivery-a thawkte.

xii)    Courier, home delivery leh e-commerce service-a thawkte.

xiii)    Private security service-a thawkte.

xiv)    Thlawhnaa zin tur thlahtu leh rawn haw phurtute.

xv)    MPSC, MSSSB, UPSC, SSC leh bank exam tur admit card kengte leh exam buaipuitute.

9.    In sak leh hnathawh kal laklawhte chu LTF-te hriatpuinain chhunzawm phal a ni a, hmun khatah mi 5 aia tam a ruala awm phal a ni lo.

10.    Páwn (dawr/office/damdawiin/vantlang hmun)-a chhuakte’n hmai an tuam ngei tur a ni.