Consumer Rights Day hman a ni

Nimin khan Vanapa Hall-ah Food, Civil Supplies & Consumer Affairs (FCSCA) department bultumin World Consumer Rights Day hman a ni a, FCSCA minister B Lal-chhanzova'n a hmanpui.

World Consumer Rights Day hmannaah hian Aizawla gas home delivery 100%-a kalpui thei awm chhun Zothan Indane, Luangmual hnenah Excellent Per-formance in LPG Home Delivery Award hlan a ni.

Minister B Lalchhan-zova chuan, consumer-te dikna chanvo zau zawka inzirtirna atan social media hman ṭangkai thiam a pawimawh thu a sawi a, "Hmasawnna ngêlnghet a awm theih nan consumer right hi thil pawimawh ber pawl a ni. Khawvel hi insumdawn tawnna hmanga kal a nih avangin sumdawngte leh anmahni dawrtute karah inringtawn leh dik taka an kalho a pawimawh," a ti.

Mahni dikna chanvo ṭheuh humhalh tura ṭan lak chu mi tin mawhphurhna a nih thu sawiin B Lalchhanzova chuan, consumer right vawnhimna chungchanga a kaihhnawih pawl leh Mizorama tlawmngai pawl hrang hrangte hmalakna fakawm a tih thu a sawi a, theihtawp chhuaha sorkar thawhpui zel turin a sáwm.

Consumer Rights Day hmannaah hian FCSCA secretary Teresy Vanlalhruaii'n World Consumer Rights Day chungchang a sawifiah a; MZU aṭangin Prof. Dr James LT Thanga'n Day thupui 'A just transition to sustainable lifestyles' tih sawiin, Mizoram Poor Federation president Lawmthanga'n Pro-poor Intervention on Ration, Card Rationalisation tih thupui an sawi bawk.