Treasury Square Bazar kângah dawr 64 leh pisa pakhat kâng ral

Nimin zing dar 3 vel khan Assembly House leh Information & Public Relations Directorate inkara Treasury Square Bazar a kâng a, dawr 64 leh pawl pakhat pisa a kâng ral.

Sorkar thuchhuah tarlan danin, Aizawl District Disaster Manage­ment Authority report-ah chuan nimin zing dar 3 vel khan kângmei a chhuak tih hriat a ni. Fire Station-in zing dar 3:29-ah kângmei chhuak report an dawng a, Khatla Fire Station aṭanga chhuak kângṭhelh motor-in dar 3:36-ah kangmei chhuahna hmun an thleng. Fire & Emergency Services leh khawtlang mipui ṭangrualin zing dar 7:30 velah an ṭhelh mit a ni.

Chhinchhiah chinah, step sira chawhmeh leh hmanraw zawrhna dawr 63 leh thingpui dawr pakhat a kâng ral a, bazar tawntirha Thanzami Tochhawng in chhâwng chung bera PAMRA pisa (Assam type) a kâng ral bawk.

Treasury Square kâng sûlhnu hi IPR minister Dr Vanlalthlana, Power & Electricity minister F Rodingliana, minister of state Lalnghinglova Hmar, adviser to CM Lalmuan­puia Punte, MLA, Aizawl mayor Lalrinenga Sailo leh deputy mayor R Thanglura leh corporator eng emaw zatin an tlawh.

Venghlui leh Tuikual local council-te chuan thuchhuah inṭâwm siamin, vanduaina thleng chu pawi an tih thu an tarlang a, "A tuartu ni tin eichawp zawngte kan tuarpuiin pawi kan ti hle. Bazar hi ṭha zawka chinfel thuai a nih theih nan kângmeiin a tihchhiat sorkar department-te bungrua senghawi leh siamṭhat hna thawh bak chu tu mahin kut lo thlak rih lo turin kan inngenin kan inhriattir a ni," an ti.