KHAWTHLIR

Assam-in hmalakna an neih hriat a ni lo

Home minister K Sapdanga chuan nimin khan Assembly session-ah BJP member Dr K Beichhua zawhna chhangin, kum 2024-25 chhungin Mizoram-Assam ramri-ah status quo bawhchhiain Assam-in hmalakna an neih hriat a nih loh thu a sawi.

Saphu káwr man

Assam Rifles sipaite chuan March 15, 2025 khan Zokhawtharah mi pahnih - Rosiamliana (40) leh Nazarene Thanga (31), Zokhawthar ve ve nia insawite hnen aṭangin saphû (Indian pangolin scale 'Manis crassicaudata') káwr kg. 64 an man. Saphu káwr leh a kawltute hi EFCC department hnenah hlan chhâwn an ni.

CSR-ah hmalak theih

Chief minister Lalduhoma a awm loh vanga a aiawha zawhna chhangtu minister K Sapdanga chuan nimin khan Assembly session-ah MNF member K Laldawngliana zawhna a chhang a; corporate social responsibility (CSR) chu MLA emaw tute pawhin an buaipuiin, hma an lak theih thu House a hrilh.

Zawrh kual khap

Kawrthah Joint VC chuan an khawtlang mipui an him zawk nan vai leh Burma lam sumdawng, in tin luta thil zuar kual ṭhinte Kawrthah khuaah an inzawrh kual an khap a, "An bungraw neihte an zuar duh a nih chuan kâwn remchang laiah emaw, bazar hmunah emaw inzuar tawh turin kan hriattir a ni. Inzuar kual lui emaw, thupek zawm lo an awm a nih chuan Joint VC-in a ṭul angin an chungah action a la ang," an ti.

Chhanchhuah hna thawh dan zirho

Disaster Management & Rehabilitation department leh 4th IR Battalion chuan nimin khan Mamit Luangpawla 4th IR Headquarters-ah chhiatrupna a lo thlen palha chhanchhuah hna thawh dan tur zirna an buatsaih a, Mamit SDO (Sadar) Lalnunfela Chawngthu-in a hawng. Training hi chawlhkar thum awh tur a ni a, 4th IR police 31 an tel a ni.

Kuhva phurh khap

Kolasib district magistrate Robert C Lalhmangaiah chuan thupek chhuahin, Kolasib district-ah dan loa kuhva rah phurh luh leh phurh chhuah khap a nih thu a puang a; thupek bawhchhiate chu dan anga hrem an nih tur thu a tarlang. DC chuan, "Mi tu mahin ram pawn aṭanga lak luh kuhva (Burmese areca nut) dah khawlna kudam an siam tur a ni lo. Kudam awm tawhte pawh Kolasib SP-in kalhin, thu leh awm hma chuan khawih chêt awih a ni lo," a ti.

Lawmthu sawi

ZPM Upa Committee chuan thuchhuah siamin, Aizawl khawpui laili taka Assam Rifles ram Mizoram sorkar hnenah March 15, 2025-a hlan a ni ta chu lawmawm an tih thu an tarlang. Upa Committee chuan, "Sorkarna lo chelh tawh Congress leh MNF ten ṭhahnemngai takin AR-te'n Aizawl khawpui an chhuahsan theih nan hma an lo la tawh a, an thawhrimnaah lawmthu kan sawi. Pathianin chawimawi a duh Pu Lalduhoma, CM leh a kaihhruai sorkar a chawimawina leh a hun ruat lo thlengah kan ngai," an ti.