Mizo infiamna leh Cultural Festival hmáwrbàwkna Aizawlah nei dawn

March 19-21, 2025 chhungin Chaltlang Field-ah Doordarshan Mizoram Indigenous Games (DD-MIG) 2024-25 hmawrbàwkna (grand finale) leh Cultural Festival buatsaih a ni dawn a; district 11 aṭangin infiammi 302-te Mizo infiamna chi nga hmangin an intihsiak dawn.

DD-MIG hruaitute chuan nimin khan Aizawl Press Club-ah thuthar thehdarhtute an kâwm a; DD-MIG 2024-25 cum Cultural Festival chu kum 2024 chhunga district 11-a Indigenous Games neiha ti ṭha zual pathum ṭheuhte inel lehna tur a nih thu an sawi a, "Mizoram district tinah nikum chhung khan buatsaih a ni a, Mizo infiamna chi nga - insuknawr, inbuan, insaihruipawh, inarpathai leh inkawibah hmangtein YMA/MTP/YLA branch 131-a mi 2,290 an inel a ni," an ti.

Aizawla final-ah hian Mizoram puma champion zawn a nih dawn thu sawiin DD-MIG hruaitute chuan, "District tina inelna chi ngaah hian top 3-ah mi 750 vel an awm a, he'ng mite inelna tura tih ni mah se, eng emaw rokhawlhna vanga tel thei lo tur an awm nual," an ti a; final-ah hian district 11 aṭangin mi 302 (mipa 206 leh hmeichhia 96) an tel dawn thu an sawi.

DD-MIG hruaitute chuan, Doordarshan Mizoram Indigenous Games-in Mizote tan rah ṭha chhuah se an duh thu sawiin, "Mipuite'n ngaihlu ila, kan Mizo infiamnate hi khawvel hriata puanzarna a nih theih avangin theihtawpa min ṭawiawm turin mi tin kan sawm a ni," an ti.