Aizawlah photogrammetry survey nei

National Geospatial Knowledge Based Land Survey of Urban Habitations (NAKSHA) programme hmalakna kal zelah March 14-15, 2025 khan Survey of India (SoI) kaihhruaina hnuaiah Garufda UAV-te chuan AMC ward XI aṭanga XIX inkar huam chhungah helicopter hmangin LiDAR leh photogrammetry survey an nei.

He hmalakna hi sorkar laipuia Department of Land Resources (DoLR) hnuaiah state sorkar leh Survey of India ten an kalpui a; February 18, 2025 khan Land Revenue & Settlement (LRS) minister B Lalchhanzova chuan a khuhhawnna a lo nei tawh.

NAKSHA hnuaia hmalaknaah hian LRS department kaihhruainain SoI leh GarudaUAV ten Aizawl khawpui chhim lam hmun hrang hrangah ground control point (GCP) 210 an siam tawh a; GCP 15-ah observation neih niin, checking point 30 siam a ni tawh. Tuna hmalakna hi pilot phase a ni a, Aizawl chhim lam square km. 97.7 tuam phawt a ni.

LiDAR hmanga Aizawl khawpui thlalak chuan digital map rintlak leh dik bakah, detailed elevation model-te a pe chhuak dawn a; drone hmangin thla lak leh tur niin, chumi data pahnih hmang chuan Aizawl khawpui 3D map siam leh a ni ang.

Record-te chu land record mumal zawk leh dik zawk bakah, urban development leh city planning atante ṭangkai taka hman theih beisei a ni.

B Lalchhanzova chuan, Aizawl chhim lama pilot project kalpui a hlawhtlin danin khawpui dangah NAKSHA scheme kalpui a nih leh nih loh a hril dawn avangin theihtawp chhuaha hma la turin thawktute a chah.