MSPMC anga inchhála hma la ṭhin an awm?

Mizoram State Project Monitoring Committee (MSPMC) chuan thuchhuah siamin, MSPMC anga insawia hmasawnna hnathawh hrang hrangte endik bakah, contractor-te vaua sorkar department hnena thil ngiat chíng an awm tih hriat a nih thu an tarlang.

MSPMC chuan, MSPMC member atan thiamna leh tawnhriat nei ṭha - mimal, political party leh tlawmngai pawl hrang hrang aiawhte sorkarin a ruat thu leh hmalakna tur pawh member-te'n an ruahman ho ṭhin thu an tarlang a, "Committee-in project zir chian duh leh tlawh duh a neihte project khawihtu leh department enkawltute a hma aṭangin mumal takin ziaka hriattir lâwk ṭhin a ni. Tun hnaiah MSPMC-in a tirh ni si lo, MSPMC hming chhála project endika insawi, contractor-te chenna-ina kala vau pah deuha a enkawltu department-te hnena thil ngiat neia kal an awm tih hriat a ni," an ti.

Pawl/mimalte'n an duh lai apiang chuk tura kal chu MSPMC kalphung a nih loh thu tarlangin MSPMC chuan, "Hei hi MSPMC chuan a duh loin pawi a ti hle. MSPMC hming chhála dik lo taka chete hi lo dawngsawng lo turin project enkawltu department leh contractor-te'n kan chah a ni," an ti a; MSPMC hming chhála hmalakna chu thleng tawh lo se an duh thu an tarlang bawk.