Aizawlah Inventors’ Challenge neih a ni

Chief Minister Bana Kaih Scheme hnuaiah nimin khan Aizawl Bawrhsap Pisapui hall-ah Inventors’ Challenge hmanga intihsiakna hmáwrbàwk a ni a; mau chihna kháwl siamtu HV Lalzuimawia, Salem Veng pakhatna a ni.

Aizawl district-a Inventors’ Challenge-ah hian project thehluh a ni a; nimin khan Aizawl Bawrhsap kaihhruaina hnuaiah endiktu tura ruat pangate hmaah pho chhuakin an sawifiah.

Project 10 zingah HV Lalzuimawia, Salem Veng siam mau chihna khawl chu pakhatna a ni a, Mizoram pum intihsiakah Aizawl district aiawhin a tel ang. Pahnihna chu F Lalhmangaiha, Hualngohmun siam automatic water pump controller a ni a, pathumna chu Kane Vanlalhriatpuia, Republic Vengthlang siam paper plate siamna a ni.

Intihsiakah hian pakhatnain Rs 25,000, pahnihnain Rs 15,000 leh pathumnain 10,000 an dawng a; district tin inelnaa pakhatna ṭheuhte state level Inventors’ Challenge-ah an la inel leh dawn a ni.