LADC EM atan mi pakua lak luh an ni

Lai Autonomous District Council (LADC) sorkara executive member (EM) atana ruat mi pakua chu nimin khan rinawmna thu tiamtira lak luh an ni.

LADC EM lak luhna inkhawm hi LADC session hall-ah neih niin, LADC executive secretary K Lalthanzara'n a kaihruai a; Lawngtlai bawrhsap Cheemala Siva Gopal Reddy chuan EM tura ruat mi pakuate chu rinawmna thu tiamtirin, EM atan a la lut a ni.

LADC EM atana lak luhte chu - Manghmunga Chinzah, K Hrekung, Lallawmsanga Apetow, LR Dingliana Chinzah, T Lalengmuana, V Zathanga, CL Lianzuala, BN Thangpuia leh L Lalhmachhuana te an ni.

Chief executive member V Zirsanga'n CEM leh EM-te hna enkawl tur a puang nghal a; ZPM Legislature Party-a MDC dang N Zangura chu Adviser to CEM atan ruat a nih thu leh Tuturu Singh chu deputy chief whip atan ruat a nih thu a puang bawk.

CEM V Zirsanga chuan, LADC-a ZPM sorkar chu kalphung tharin a kal dawn tih sawiin, thil ṭha lo paihin, thil ṭha zawk nia langte chu ram mipui tan kalpui an tum thu a sawi a; ram tana ṭha turah huaisen takin theihtawp an chhuah zel tur thu sawiin, LADC sorkar tan ṭawngṭai uar turin mipui a sáwm a ni.