Hripui vei hmuh thar mi 34 zingah Tualchhunga kái 28, symptom nei 15

October 26, Thawhṭannia Covid-19 vei hmuh chhuah mi 34 zinga mi 28 chu Mizoram chhunga kai chhawng (local positive contact) an ni a; an zinga mi 15 chu an kài ṭanna hriat theih a ni lo a, taksaa harsatna nei mi 15 an awm bawk.

Sorkar thuchhuah leh hripui kai hmuh tharte khawtlang hruaitute aṭanga thu dawn danin, Thawhṭannia Covid-19 positive hmuh chhuah, Mizoram chhunga kaite chu district paruk (Aizawl telin)-a khua/veng 15-a mite an ni a; Aizawla veng pariat leh khaw dang pasariha chêngte an ni.

Mizoram chhunga kái chhâwng mi 28 zinga a tam zawk, mi 15 chu an kài chhan hriat a ni lo a, mi 13-te chu an kàina leh kài chhan hriata ngaih a ni. Mi 15-in Covid-19 symptom an nei a, mi 13-in an nei lo thung. A naupang ber chu nausén thla 3 mi niin, symptom a nei a; a upa ber chu kum 87 niin, symptom a nei lo.

Mi 28 zingah hian Staines Memorial School, Chanmari, Aizawla kal zirlai pathum an tel a; Rosebud School, Ramhlun Venglaia kal zirlai pahnih an tel bawk.