Assam-in Saihapuia IR chhuak turin a ti Mizo IR-te'n chhuah tum lo, bûk an sa Assam police-in Saihapui-V khaw mite an huanah kal an phal lo

Cachar District Forest Officer (DFO) hoin October 26, Thawhṭanni tlai khan Assam Forest department mite leh police eng emaw zat chu Saihapui-V khuaah kalin, khaw dáia Mizo IR sipai duty-te chu an awmna hmun chhuahsan turin an hriattir. Mizo IR-te hian an duty-na hmun chhuahsan an tum lo a, nimin khan khawtlangin riahbûk an saksak. Hetihlai hian Assam police-te chuan Saihapui-V mipuite chu an leilet/huanah kal an phal lo.

Saihapui-V aṭanga Vanglaini thu dawn danin, Cachar DFO leh police-te chu Thawhṭanni tlai khan Saihapui-V khaw chhungah pawh an lut a, Forest checkgate siamna tur hmun an enfiah. Khaw dáia Mizo IR duty-te chu an awmna hmun chhuahsan turin an hrilh a, harsatna erawh an siam zui lo.

Assam sorkara Forest department mi leh sate leh police-te Saihapui V-a an kal hnuah Mizoram sorkar chuan Thawhṭanni zan leh nimin khan Saihapui V-ah police a dah belh nghal a ni.

Assam Forest mi leh sate chu nimin khan Saihapui-V khaw dáia Mizo IR sipaite duty-na hmunah an kal leh a; Mizoram Forest department hotute chuan, IR police checkgate siamna tur hmun pawh en thilthlai tawh lo turin an lo hrilh a, Assam sorkar mite chu an kîrtir. Nimin tlai dar 4 vel khan Assam police 30 vel an kal leh bawk a, Mizoram police-te'n lei-ah an lo dang. Mizoram police hotute biak an duh thu sawi mah a, an inhmuh hmain an lêt leh a ni.

Saihapui V-ah hian Mizoram police-te chu Kolasib SP Vanlalfaka Ralte hoin an awm mek a, police indah belh zel a nih avangin sikul leh hall-te an luah khat tawh a; nimin khan Saihapui-V khawtlang mipuiin an khaw dáiah police-te riahna tur bûk an sa a ni. Saihapui-V khawtlang mipuite chu buaina a chhuah palha lo hmachhawn turin an theih ang angin an inbuatsaih ve tih an sawi. 

Tarlan tawh angin, October 16, 2020 zan dar 8 velah Assam Police leh Forest mite chu Saihapui-V khaw dáia Mizoram police checkgate leh village task force (VTF) duty post-ah an kal a; duty-na hmun chu chhuahsan turin an hrilh. Chumi aṭanga darkar hnih hnu velah an enfiah leh tur thu an sawi a ni.

Saihapui-V duty post-ah hian Mizoram Police leh Excise & Narcotics mi pali an awm a; Assam police-te an kal avang leh chhuak tura an tih avangin Mizoram sorkarin police an dah belh nghal. An sawi lâwk angin Assam sorkar mite pawh Saihapui V-ah an kal leh a, buaina awm loin an kîr leh a ni.

October 17, Inrinni chawhma dar 11 velah Assam police leh tualchhung (civil) mi ṭhahnem tak chu Saihapui-V dáia duty post-ah an kal leh a, Mizoram police-te nen an inhnial hnuah Saihapui-V VTF duty post chu Assam civil mite'n an ṭhiat. Chumi hnu aṭang chuan Assam police-te chu Saihapui-V VTF duty-na ṭhin chu an luah zui nghal a ni.

Saihapui-V khawtlang hruaitute chuan, Assam police-te duty mekna aṭanga kilometre chanve vel, Assam state lam hnaihah leilet leh huante an neih hlawm thu an sawi a, "Kan pi leh pute hun aṭang tawha kan neih a ni. Mahse, October 17, 2020 hnu aṭangin Assam police-te'n kal an phal tawh lo a, buh leh thlai seng hun laite a ni a, kan buai khawp mai. Keini chuan hei hi kan vei ber pakhat a ni," an ti.