Covid-19 No Tolerance Fortnight District-ah khauh taka kalpui a ni

Covid-19 No Tolerance Fortnight chu district hrang hrangah October 26 aṭangin khauh taka kalpui mek zel a ni. Aizawl Municipal Corporation (AMC) huam chhungah erawh chuan inkhuahkhirhna khauh zawk kalpui a nih avangin Fortnight hi kalpui chhunzawm a ni lo.

Vanglaini palai zawhna ­chhang­in Lunglei SP Stephen Lalrinawma chuan, Fortnight khauh taka an kalpui thu a sawi a, "Khawng taka kalpui a ni a, veng hrang hrangah duty kan indah. Covid-19 vanga dan leh zawm tur hrang hrang bawhchhia man tur an awm reng a, traffic police lam pawhin man tur an la nei reng a ni," a ti.

Stephen Lalrinawma chuan, Fortnight hman a nih hma pawhin Covid-19 avanga dan siam hrang hrang zâwm lote vâi reng an nih thu sawiin, "Flying squad pahnih kan din a, anni hian dan zâwm lote an vâi reng. Mask vuah lamah chuan mipuite'n hma an sawn hle," a ti a; social distancing lamah erawh ṭan lâk a ngaih thu a sawi.

Champhai SP Rex Zarzoliana chuan Vanglaini palai zawhna chhangin, "Covid-19 No Tole­rance Fortnight khauh takin kan kalpui a, khawlaiah dan bawhchhia vaiin kan intír kual reng. Thawhṭanni ringawt khan dan bawhchhiate pawisa chawi tling khawm chu Rs. 19,300 a ni. Lirthei dan bawhchhia lam chu kan la endik lutuk lo," a ti.

Kolasib SP Vanlalfaka Ralte pawhin Vanglaini zawhna chhangin, Kolasib district-ah chuan Kolasib khawpui bakah, khaw dangahte pawh Covid-19 No Tolerance Fortnight kalpui a nih thu a sawi a, "Dan bawhchhia man tur an la awm reng," a ti a; Vairengte bikah chuan boruakin a zir loh avangin khauh taka kalpui theih a ni rih lo tih a sawi.

Mamitah chuan Covid-19 No Tolerance Fortnight hman a nih aṭanga nimin tlai dar 2 thleng khan dan bawhchhia mi 15 man a ni tawh a, chu'ng mite pawisa chawi tling khawm chu Rs. 2,400 a ni.