MPYCC-in ramri chinfel dan thurûk Hmang turin Chief Minister an phût

Mizoram Pradesh Youth Congress Committee (MPYCC) chuan thuchhuah siamin, chief minister Zoramthanga chu ramri chinfel dan thurûk a hriat hmang tawh tura an phût thu an tarlang.

MPYCC chuan, tun hnaiah Mizoram leh Assam ramria boruak ṭha lo thlengah Mizo IR sipaite sorkarin hmang ṭangkaiin, Mizo mipui thlamuantu an ni tih an tarlang a, "Mizo IR-te ramri buainaa an ṭangkai avang hian Bihar state inthlanpuia duty turte chu Mizoram sorkarin ramri boruak a fel hma chu kaltir an nih loh tur thu a tarlang. Mahse, ramri boruak a fel hma hauhin Mizo IR police ṭhahnem tak Bihar lamah duty-in an kal ta si hi Mizoram sorkar hian lan mawi a tum luatah Mizo mipui min bum a ni," an ti.

Bihar state inthlanpuia duty turte ramri boruak a fel hma chuan kan tír thla lo ang, tia an puanzar rual rualin Bihar inthlana duty tur IR police-te sorkarin a ruahman fel vek nia sawiin MPYCC chuan, "Central YMA office bearer-te hnena CM-in IR sipaite Bihar lama tirh an nih rih loh tur thu a sawi tûk lawk, October 24 khan IR leh MAP company pali lai Bihar lama duty tur thlah liam zui an ni," an ti a; Mizo mipui leh CYMA hmaah sorkar hotu lian berin dâwt a sawi niin an tarlang.

Congress ṭhalaite chuan, tun hnaiah Mizoram leh Assam ramri boruak a awm leh a, Saihapui-V lamah buaina thâwm a awm leh chu pawi an tih thu tarlangin, "Council of Ministers ṭhukhawmin a rèl tawh angin, Assam ramri depa Mizo mipui thlamuanna turin armed police tam zawk tír thuai turin sorkar kan ngen. Chief Minister-in ramri chinfel dan thurûk a hriat thu a lo sawi tawh fo tawh hi tun hunah hian mipuia puangzar kher lo pawhin hmang tawh turin kan phût a ni," an ti.