Mizoramah Tripura minister hoin sakhaw thilah an inthâwi - MSU

MIzo Students' Union (MSU) chuan thuchhuah siamin, Tripura-a Bru-te'n Phuldungsei VC huam chhunga Thaidawr tlang, Mizoram lam chana Shiv Mandir sak an tumna hmunah Tripura Forest minister Mevar Kumar Jamatia hoin sakhaw thilah an inthawi tih an tarlang a, "Kan dem a, hriatthiam har kan ti tak zet," an ti.

MSU chuan, October 26, Thawhṭanni khan Tripura sorkara minister hoin North Tripura DC leh SP bakah, Kanchandpur SDM leh SDPO hoin Shiv Mandir sak tumna bul hnai Mizoram chhunga Bru-te'n sakhaw serh leh sâng inthawina an nei tih an tarlang a ni.

MSU chuan, "He thil an hriat rual hian Mizo Convention Youth Wing, Zampui Hills chu a hmunah kal nghalin, a hmun an thlen hian minister ho hi an lo tlân chhuak hman a ni," an ti. Tripura State Rifles-te erawh a hmunah an duty reng a, Mizoram sorkar lam mite erawh hmuh tur an awm lo tih an tarlang.

Mizoram chhunga Bru mi tlemtête'n Tripura minister hoa phal lohna hmuna sakhaw serh leh sâng an khawih chu Mizo hnam leh sakhua zah lohnaa an ngaih thu sawiin MSU chuan, "Vawiin (nimin) khan Chief Secretary hmuin sorkara kan beiseite kan thlen. Zampui tlangdunga Mizote thlamuan tur leh Mizoram ramri venghim a, Thaidawr tlang hi Mizoram a nih ang ngeia kan ram hauh a ni tih lantir turin Thaidawr tlangah Mizoram police dah ngei kan phût a ni," an ti.